ޚައިރު ފައުންޑޭޝަނުން އިސްނަގައި ދަރަނބޫދޫ ސްކޫލުގެ ތިމާވެށި ކުލަބާއި ގުޅިގެން ފެއްޓެވި ދަނޑުވެރި ދަރިވަރު ޕްރޮގްރާމްގައި ހެއްދި ލެޓިއުސް ވިއްކަން ފަށައިފިއެވެ.

ދަރަނބޫދޫ ސްކޫލުގެ ގްރޭޑް 8 އަދި 9 ގެ ދަރިވަރުން ހައްދާފައިވާ ލިޓިއުސް ފަތުގެ ފުރަތަމަ ބެޗު ދަރަނބޫދޫ ރައްޔިތުންނަށް ވިއްކާފައިވާއިރު ފުރަތަމަ ބުރުގައި 180 ގަސް ވަނީ ހައްދާފައެވެ. ގަސް ހެއްދުމުގެ ހުރިހާ މަސައްކަތެއްވެސް ކޮށްފައިވަނީ ދަރިވަރުންނެވެ. މި ޕްރޮގްރާމްގެ ދަށުން ދަނޑުވެރިކަމާއި ގުޅޭ މަޢުލޫމާތާއި ތަމްރީނުތައް ދަރިވަރުންނަށް ފޯރުކޮށް ދީފައިވަނީ ޚައިރު ފައުންޑޭޝަނާއި ޕްލާންޓް އަ ޓްރީ ޖަމްޢިއްޔާ ގުޅިގެންނެވެ.

ދަނޑުވެރި ދަރިވަރު ޕްރޮގްރާމްގައި ލެޓިއުސް ފަތް ހެއްދުމަށް ޚައިރު ފައުންޑޭޝަނުންވަނީ ދަރަނބޫދޫ ސްކޫލަށް ވާޓިކަލް ފާމިން ސިސްޓަމެއް ހަދިޔާކުރައްވާފައެވެ. އެ ފައުންޑޭޝަނުންވަނީ މި ޕްރޮގްރާމް ކާމިޔާބުކަމާއެކު ކުރިއަށް ގެންދިއުމަށް ޕްރޮގްރާމްގެ ތެރެއިން ހައްދައި ވިއްކާ ބާވަތްތަކުން ލިބޭ ފައިސާ ސީދާ މި ޕްރޮގްރާމަށް ޚަރަދުކުރުމަށް ނިންމާފައެވެ. އަދި ފ.އަތޮޅުގެ އެހެން ރަށްރަށުގެ ސްކޫލްތަކުގައިވެސް މި ޕްރޮގްރާމް ތަޢާރަފްކޮށް ދަނޑުވެރިކަމުގެ ހުނަރާއި ކަމާއި ގުޅުންހުރި މަޢުލޫމާތުތައް ދަރިވަރުންނަށް ދަސްކޮށް ދިނުމަކީ އެ ފައުންޑޭޝަނުން ގެންގުޅެމުން އަންނަ ވިސްނުމެކެވެ.

ދަރަނބޫދޫ ސްކޫލުގެ ދަރިވަރުން ގާތްގަނޑަކަށް ދޮޅު މަހެއްހާ ދުވަހުން ކުރި މަސައްކަތުން ލެޓިއުސް ހައްދައި މާކެޓަށް ނެރުމާއެކު މީސް މީޑިއާގައި ގިނަ ބަޔަކުވަނީ އެކުދިންގެ މަސައްކަތަށް ތަޢުރީފު ކުރައްވާފައެވެ.