ފުއްޓަރު ސްޕޯޓްސް ކުލަބުގެ ޖަޒީރާ ލީގު 2024 ގައި ބައިވެރިވުމުގެ ފުރުސަތު އާންމުކޮށް ހުޅުވާލައިފިއެވެ.
ޖަޒީރާ ލީގަކީ ދަރަނބޫދޫގެ ފުޓްސަލް ޓީމުތަކަށް ބައިވެރިވެވޭ ގޮތަށް ބާއްވަމުން އައިސްފައިވާ މުބާރާތެކެވެ. އެކި ސަބަބުތަކާއި ހުރެ މިދިޔަ އަހަރު މި މުބާރާތް ބޭއްވިފައި ނުވިނަމަވެސް، މިއަހަރުގެ މުބާރާތް ބާއްވަން ނިންމާފައިވަނީ މިދިޔަ އަހަރުގެ މުބާރާތެއް ގޮތަށް ނަން ދެވިގެންނެވެ.
ފުއްޓަރު ސްޕޯޓްސް ކުލަބުން މީގެ އިރުކޮޅެއްކުރިން ފޭސްބުކްގައި އާންމުކޮށްފައިވާ ޕޯސްޓެއްގައި، މި މުބާރާތް މިމަހުގެ 15 ވަނަ ދުވަހު ފެށުމަށް ނިންމާފައިވާކަމަށް ވަނީ ބުނެފައެވެ. މުބާރާތުގެ ޤަވާއިދާއި، ބައިވެރިވުމުގެ ސުންގަޑި އާންމުކޮށްފައި ނުވިނަމަވެސް އެކުލަބުން އެދިފައިވަނީ މުބާރާތާއި ގުޅޭ އިތުރު މަޢުލޫމާތު ހޯދުމަށް އެކުލަބުގެ ފޭސްބުކް އަދި އިންސްޓަގްރާމަށް މެސެޖު ކުރުމަށެވެ.
ޖަޒީރާ ލީގަކީ 2022 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އެގޮތުން ލީގުގެ ފުރަތަމަ މުބާރާތް 2022 ވަނަ އަހަރުގެ ޖަނަވަރީ މަހު ބާއްވާފައިވާއިރު، އެއަހަރުގެ ޖުލައިމަހު ވަނީ ދެވަނަ މުބާރާތް ބާއްވާފައެވެ. މިލީގުގެ ތިންވަނަ މުބާރާތް ބާއްވާފައިވަނީ 2023 ވަނަ އަހަރުގެ ޖުލައި މަހުގައެވެ.
މި ލީގުގެ ޗެމްޕިއަންކަން އަދި އެއްވެސް ބަޔަކަށް 1 ފަހަރަށްވުރެ އިތުރަށް ހޯދިފައި ނުވެއެވެ. މުބާރާތުގެ އެންމެ ފުރަތަމަ ޗެމްޕިއަންކަން ހޯދީ ގަޓްސިޓީ އިންނެވެ. އެޑް ޖަމްޢިއްޔާއިން ދެވަނަ މުބާރާތުގެ ޗެމްޕިއަންކަން ހޯދާފައިވާއިރު، އެންމެ ފަހުން މިމުބާރާތުގެ ޗެމްޕިއަންކަން ހޯދާފައިވަނީ ބީސީ ސްޕޯޓްސް އިންނެވެ.
