ދަރަނބޫދޫގައި މިހާރު ބޭނުންކުރަމުން އަންނަ ފުޓްސަލް ދަނޑުގެ ތަޖުރިބާއަށް ބަލާފައި މިހާރު ހަދަމުން އަންނަ ދަނޑުގެ ޓާފް އަޅާނީ ޒުވާނުން ދަނޑަށްގޮސް ދަނޑުގެ ފަސްގަނޑުބަލައި އާނބަސް ބުނުމުން ކަމުގައި ދަރަނބޫދޫ ކައުންސިލްގެ ރައީސް އަބްދުލް ޙަމީދު އާދަމް ވިދާޅުވެއްޖެއެވެ. ކައުންސިލްގެ ރައީސް މިފަދައިން ވިދާޅުވީ އަލަށް ތަރައްޤީ ކުރަމުންދާ ފުޓްސަލް ދަނޑުގެ ޕިޗާއި ބެހޭގޮތުން ޒުވާނުންނާއެކު މިއަދު ކައުންސިލުން ބޭއްވި ބައްދަލުވުމުގައެވެ.
ކައުންސިލްގެ ރައީސްގެ ވާހަކަފުޅުގައި މިހާރު ބޭނުންކުރަމުންދާ ފުޓްސަލް ދަނޑުގެ ފެންވަރާއި ބެހޭގޮތުން ޒުވާނުންގެ މެދުގައި ހިތްހަމަނުޖެހުން އެބައޮތެވެ. އަދި އެދަނޑުގައި ކުޅުންތެރިންނަށް އެކިވަރުގެ ގެއްލުންތަކެއް ލިބިގެން ދިޔަކަމަށާއި އެކަން އެގޮތަށް ދިމާވެފައިވަނީ ދަނޑު ހަދާފައިވާ ފެންވަރު ދަށްކަމުންކަމުގައެވެ. ޚާއްސަކޮށް ދަނޑުގެ ޕިޗު ލެވެލް ކުރުމުގައި ހަދާފައިވާ ގޯސްތަކެއްގެ ވާހަކަ ޒުވާނުން ދައްކަމުން އަންނަކަމަށާއި، މިހާރު ތަރައްޤީ ކުރަމުންދާ ދަނޑުގައި އެކަން ތަކުރާރުވިޔަ ނުދިނުމަކީ ކައުންސިލުން އިސްކަމެއް ދެއްވާނެކަމެއް ކަމުގައި ވިދާޅުވިއެވެ.
ރައީސް ވިދާޅުވީ ދަނޑުގެ ފަސްގަނޑު ހަރުކުރުމުގެ މަސައްކަތް ވަރަށް އަވަހަށް ފެށޭނެކަމަށާއި، އެހެންކަމުން އެ މަސައްކަތް ކުރިއަށް ގެންދާގޮތް ރަށުގެ ޒުވާނުން ސީދާ ދަނޑަށް ގޮސް ބެލުމަކީ ކައުންސިލުން ބޭނުންވާ ގޮތްކަމުގައެވެ. މިހާރު ދަނޑުގެ މަސައްކަތް ގޮސްފައިވާ ހިސާބުގައި ކުރެވިފައިވާ މަސައްކަތްތަކުގައި ކޮންމެވެސް ވަރެއްގެ ޝަކުވާތަކެއް ހުރިނަމަވެސް، ޕިޗާއި ގުޅުންހުރި މަސައްކަތްތައް ދޫކޮށް ނުލައްވާނެކަމަށް ރައީސް ވިދާޅުވިއެވެ.
މިކަމާއި ބެހޭގޮތުން މަޝްވަރާކުރަމުން ކައުންސިލްގެ ރައީސް ޒުވާނުންގެ ފަރާތުން އެދިލެއްވީ މަސައްކަތް ކުރަމުންދާ ފަރާތުން ދަނޑު ލެވެލްކޮށް ހަރުކުރުމުން، ޒުވާނުން ޤަބޫލުކުރާ ފެންވަރަކަށް އެކަން ކޮށްފައިވާ ކަމުގެ ޔަޤީންކަން ކައުންސިލަށް ދިނުމަށެވެ. އެކަން ކުރެވޭނީ ޒުވާނުން ދަނޑަށްގޮސް ބަލައިގެން ކަމަށާއި އެކަމުގައި ކައުންސިލަށް ޒުވާނުން އެއްބާރުލުން ދިނުމަށް ރައީސް ތަކުރާރުކޮށް އެދިލެއްވިއެވެ. ޒުވާނުންގެ ފަރާތުން އެޔަގީންކަން ލިބުނުން ދަނޑުގައި ދެންހުރި މަސައްކަތްތައް ލަސްތަކެއްނުވެ ނިންމައި ދޭނެކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ، މިހާރު މަސައްކަތް ކުރިއަށްދާ ސްޕީޑަށް ބަލާއިރު، ދަނޑުގެ މަސައްކަތް މިމަހު ފަހު ކޮޅުގައި ނުވަތަ އަންނަމަހުގެ ކުރީކޮޅުގައި ނިންމާލެވޭނެކަމަށް ބެލެވޭކަމަށެވެ.
