2023 ވަނަ އަހަރަށްވުރެ މިދިޔަ އަހަރު ދަރަނބޫދޫ ޕޮލިސް ޕޯސްޓަށް ހުށަހެޅިފައިވާ މައްސަލަތަކާއި ރިޕޯޓްކޮށްފައިވާ ކަންކަން އިތުރު ވެފައިވާކަމަށް ދިވެހި ފުލުހުންގެ ޚިދުމަތުން މަޢުލޫމާތު ދެއްވައިފިއެވެ. ދިވެހި ފުލުހުންގެ އިދާރާއިން މި މަޢުލޫމާތު ދަނިއުސްއަށް ފޯރުކޮށް ދީފައިވަނީ ފ. ދަރަނބޫދޫ ޕޮލިސްޕޯސްޓަށް ހުށަހެޅިފައިވާ މައްސަލަތަކުގެ ތަފްޞީލް ހޯދުމަށްއެދި ހުށަހެޅި ފޯމަށް ދެއްވި ޖަވާބުގައެވެ.
ފާއިތުވީ ދެ އަހަރު ހުށަހެޅިފައިވާ މައްސަލަތަކުގެ ތަފާސް ހިސާބުތަކަށް ބަލާއިރު 2023 ވަނަ އަހަރަށްވުރެ 2024 ވަނަ އަހަރު ހުށަހެޅުނު ރިޕޯޓުތަކާއި މައްސަލަތަކުގެ އަދަދު އިތުރުވެފައިވަނީ ވަރަށް ކުޑަކޮށްނަމަވެސް، ދެ އަހަރުވެސް ހުށަހެޅިފައިވަނީ ސީރިއަސް މައްސަލަ ތަކެއްކަން ފާހަގަކުރެވެއެވެ.1
2023 ވަނަ އަހަރު ދަރަނބޫދޫ ޕޮލިސް ޕޯސްޓަށް ހުށަހެޅިފައިވާ މައްސަލަތަކަށް ބަލާއިރު މުދަލާއި ތަކެއްޗަށް ގެއްލުން ދިނުމުގެ އެއް މައްސަލައާއި ޖިންސީ ކުށްތަކާއި ގުޅޭ 1 މައްސަލަވަނީ ހުށަހަޅާފައެވެ. ޖިންސީ ކުށެއްކަމަށް ބުނެފައިއެވާ މައްސަލަ 2023 ވަނަ އަހަރު ތަޙުޤީގު ކޮށްފައިވާއިރު އެމައްސަލަ ނިންމާ ފައިލްކޮށްފައިވަނީ ހުސްވި 2024 ވަނަ އަހަރުގައެވެ. މީގެ އިތުރުން 2023 ވަނަ އަހަރު “އެހެނިހެން” މައްސަލަތަކުގެ ގޮތުގައި 2 މައްސަލައެއް ހިމަނާފައިވާއިރު، އެއްގަމު އުޅަނދުގައި މީހުން އުފުލުމަށް ކަނޑައަޅާފައިވާ އަދަދަށްވުރެ އިތުރަށް މީހުން އުފުލައިގެން 2 މައްސަލައެއް ރިޕޯޓްކޮށްފައިވެއެވެ. މި މައްސަލައާއި ގުޅިގެން 1000ރ ގެ ޖޫރިމަނާއެއް ކޮށްފައިވާކަމަށް ފުލުހުން ދެއްވާފައިވާ ޖަވާބުގައި ވަނީ ފާހަގަކޮށްފައެވެ.
2024 ވަނަ އަހަރު ދަރަނބޫދޫ ޕޮލިސް ޕޯސްޓަށް ހުށަހެޅުނު މައްސަލަތަކަށް ބަލާއިރު މާރާމާރީ ހިންގުމުގެ 1 މައްސަލަ، ވައްކަން ކުރުމުގެ 1 މައްސަލަ، ޚިޔާނާތްތެރި ވުމުގެ 1 މައްސަލައާއި، ބިރުދައްކައި އިންޒާރު ދިނުމުގެ 1 މައްސަލައިގެ އިތުރުން “އެހެނިހެން” ބާވަތުގެ މައްސަލަ ގޮތުގައި 1 މައްސަލަ ރިޕޯޓްކޮށްފައިވެއެވެ. އަދި މި އަހަރުވަނީ ޤުދުރަތީ ކާރިސާއެއް/ޙާދިސާއެއްގެ ގޮތުގައި 1 މައްސަލަ ރިޕޯޓް ކޮށްފައެވެ.
މި މައްސަލަ ތަކުގެ ތެރެއިން ބިރުދައްކައި އިންޒާރު ދީފައިވާ މައްސަލަ ތަޙުޤީގުކޮށްފައި ވާނަމަވެސް އަހަރު ނިމިގެން ދިޔައިރު އެ މައްސަލަ އެއްކޮށް ނިމިފައިނުވާކަމަށް އެއިދާރާއިން މަޢުލޫމާތު ދެއްވާފައިވެއެވެ.
ނިމިދިޔަ އަހަރުގެ އިތުރު ކަންކަމަށް ބަލާއިރު، ލައިސަންސް ނެތި އެއްގަމު އުޅަނދު ދުއްވައިގެން 3 ފަރާތެއް ޖުމުލަ 4000ރ އިން ޖޫރިމަނާ ކޮށްފައިވެއެވެ. އަދި އެއްގަމު އުޅަނދު ދުއްވަމުން މުވާޞަލާތީ ވަޞީލަތެއް ބޭނުން ކޮށްފައިވާ މައްސަލައިގައި 1 ފަރާތެއް 750ރ އިން ޖޫރިމަނާ ކޮށްފައިވާކަމަށް ފުލުހުން ދެއްވި މަޢުލޫމާތު ތަކުގައި ހާމަކުރައްވާފައިވެއެވެ.
