ފ. ބިލެއްދޫން މާލެ ދަތުރުކުރާ ފަސޭހަ ބޯޓު ދަރަނބޫދޫ ނެރުގެ އިރުމަތީ ފައިކައްޓަށް މިރޭ އުރިއްޖެއެވެ.

މި ހާދިސާ ހިނގާފައިވަނީ މިރޭ ގަޑިން 18:40 ކަން ހާއިރު، ބޯޓު ދަރަނބޫދޫ ނެރުން ވަދެގެން ބަނދަރުކުރުމަށް އައުމުގެ ތެރޭގައެވެ. ބޯޓު ނެރުފައިކައްޓަށް އުރުމާއެކު ދަރަނބޫދޫ ކައުންސިލްގެ އިސްނެގުމާއެކު ރައްޔިތުން ނިކުމެވަނީ ފުން ކުރުމުގެ މަސައްކަތް ކޮށްފައެވެ. ބޯޓު ފުންކުރެވިފައިވަނީ 19:20 ކަން ހާއިރުގައެވެ.

ނެރުފައިކަށްޓަށް އެރުމާއި ގުޅިގެން ބޯޓަށް ލިބިފައިވަނީ ކިހާވަރެއްގެ ގެއްލުމެއްކަން އަދި މުޅިން ސާފެއް ނުވެއެވެ. ބޯޓު ފުންކުރުމުގެ މަސައްކަތުގައި ޢަމަލީގޮތުން ބައިވެރިވި ބައެއް ފަރާތްތަކުން ހާމަކުރި ގޮތުގައި ބޯޓަށް މާބޮޑު ގެއްލުންތަކެއް ލިބިދާނެކަމަކަށް ނުބެލެވެއެވެ. މިހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ.

ފ. ބިލެއްދޫގައި މުދާ އުފުލުމަށް ޚާއްސަކުރެވިފައިވާ މި ބޯޓަކީ މީގެ އަހަރު ތަކެއްކުރިން ފ.ނިލަންދޫގައިވެސް ބޭނުންކޮށްފައިވާ ބޯޓެކެވެ. އަދި މިބޯޓަކީ އެކި ފަހަރުގެ މަތީން ދަރަނބޫދޫ ނެރުފައިކައްޓަށް އުރުމުގެ ހާދިސާތަކެއް ހިނގާފައިވާ ބޯޓެއްކަން ފާހަގަކުރެވެއެވެ.

އިރުވައި މޫސުމުގެ ބާރު އޮއިގައި ދަރަނބޫދޫ ނެރަށް ވަނުމަކީ ބައެއް ފަރާތްތަކުން ވަރަށް ސަމާލުކަން ދޭންޖެހޭ ކަމެކެވެ.