މިދިޔަ ހުކުރު ދުވަހު ފ.އަތޮޅު ރަށްތަކުގައި ފެންބޮޑުވި ހާދިސާއާއި ގުޅިގެން އެންމެ ބޮޑު ގެއްލުމެއް ލިބިފައިވަނީ ފ.ނިލަންދޫއަށްކަމަށް ފުލުހުން ހާމަކުރައްވައިފިއެވެ. ފުލުހުން މިފަދައިން ހާމަކުރެއްވީ މިދިޔަ ހުކުރު ދުވަހު ކުރި ވިއްސާރައާއި ގުޅިގެން އަތޮޅު ރަށްތަކުގެ ރައްޔިތުންނަށް އެހީވުމަށް ފުލުހުން ކުރެއްވި މަސައްކަތްތަކާއި ގުޅޭގޮތުން ދަނިއުސްއަށް ދެއްވި އިންޓަވިއުއެއްގައެވެ.

ފ.އަތޮޅަށް ދިމާވި ފެންބޮޑުވުމުގެ ހާދިސާއާއި ގުޅިގެން ރައްޔިތުންނާއި މުދާތައް ރައްކާތެރިކުރުމުގެ މަސައްކަތުގެ ކުރީ ސަފުގައި ބުރަ މަސައްކަތްތަކެއް ކޮށްދެއްވި އެއްބަޔަކީ ފާފު ފުލުހުންނެވެ. އެބޭފުޅުންވަނީ އެހީތެރިކަން ބޭނުންވި ހުރިހާ ރަށެއްގައި ގިނަގުނަ މަސައްކަތްތަކެއް ކޮށްދެއްވާފައިކަން ފާހަގަކުރެވެއެވެ.

ހުކުރު ދުވަހުގެ އެ ހާދިސާއާއި ގުޅިގެން ފ.އަތޮޅުގެ ހުރިހާ ރަށެއްގައި ފެންބޮޑުވިނަމަވެސް، އެންމެ ބުރަ މަސައްކަތެއް ކުރެވިގެން ދިޔައީ ފ. ނިލަންދޫގައެވެ. މިވަގުތު ނިލަންދޫ ޕޮލިސް އިންޗާޖުގެ ޒިންމާއާއި ޙަވާލުވެ ހުންނެވި އަޙްމަދު ރަމީޒް ވިދާޅުވީ ނިލަންދޫގެ ބޮޑުބައެއް އޮތީ އަޑީގައި ކަމަށާއި، ވާރޭ ވެހިގެން މިއިން ޒަމާނެއްގައިވެސް ނުވާވަރަށް މިފަހަރު ފެންބޮޑުވިކަމަށެވެ. ހުކުރު ދުވަހުގެ މެންދުރު 13:30 ކަންހާއިރު ވާރޭ ތުނިކޮށްލިނަމަވެސް، ފެން ހިންދުމުގެ މަސައްކަތުގައި އެދުވަހުގެ އިރުއޮއްސުނު ފަހުންވެސް އުޅެން ޖެހުނުކަމަށް ރަމީޒް ވިދާޅުވިއެވެ.

އެދުވަހުގެ މަސައްކަތުގައި އެންމެ ބުރަކޮށް އުޅެންޖެހުނީ ނިލަންދޫގައި ހުންނަ ތެޔޮ ރައްކާކުރާ ތަނުގައިކަން ހާމަކުރަމުން ރަމީޒް ވިދާޅުވީ، ތެލުގެ ސްޓޯރޭޖް ހުންނަނީ ބިމުއަޑީގައިކަމުން އެސަރަޙައްދުގައި ފެންބޮޑުވުމާއި ގުޅިގެން ސްޓޯރޭޖުން ތެޔޮ ލީކްވެ ރަށުތެރެއަށްވެސް ފެތުރިގެން ދިޔަކަމަށެވެ. އަދި އެތަން ރައްކާތެރި ޙާލަތަކަށް ގެނައުމަށް އެންމެން ގުޅިގެން ގިނަ މަސައްކަތް ތަކެއް ކުރެވުނު ކަމަށް އޭނާ ވިދާޅުވިއެވެ. އަދި އެހެން ރަށްރަށެކޭ އެއްފަދައިން ފެންބޮޑުވި ހިސާބުތަކުން ފެންހިންދުމާއި، ގޭގެއިން ފެން ބޭރުކޮށް މުދާ ރައްކާތެރި ކުރުމަށްވެސް ބުރަ މަސައްކަތްތަކެއް ކުރަންޖެހުނުކަމަށް ވިދާޅުވިއެވެ.

ހުކުރު ދުވަހު ފެންބޮޑުވި ހާދިސާއާއި ގުޅިގެން ފ.އަތޮޅު “ފެނުއަޑިއަށް” ދިއުމާއި ގުޅިގެން މިފަދަ އެހެން ހާދިސާއަކަށް އަތޮޅު ތައްޔާރުވެފައިވަނީ ކިހާވަރަކަށްތޯ ސުވާލު ކުރުމުން ރަމީޒް ވިދާޅުވީ މި ހާދިސާއިންވެސް އެނގިގެން ދިޔައީ އަތޮޅުގެ ރަށްރަށުގައި މިފަދަ ކަމަކަށް ބޭނުންވާ ވަރާއި ގާތަށްވެސް ވަސީލަތްތައް ޤާއިމްވެފައި ނެތްކަމުގައެވެ. މީގެ ކުރިން ޑިޒާސްޓާރ މެނޭޖްމަންޓް ސެންޓަރުން ބައެއް ރަށްރަށަށް ފެން ހިންދުމަށް ޕަމްޕެއް ދީފައި ހުރިނަމަވެސް، އެއީ ކުޑަމިންވަރެއްކަމަށާއި، ކަމެއް ދިމާވީމައި އޮޑިދޯނި ފަހަރުންނާއި އާންމުންގެ އަތުން ތަކެތި ހޯދަންޖެހޭކަމަށްވާނަމަ، އެގެއްލެނީ ވަރަށް ވަގުތުކަމަށް ވިދާޅުވިއެވެ. އަދި އެހެން ދިމާވާއިރު ގިނަފަހަރު އޮންނަނީ ރައްޔިތުންގެ މުދަލަށް ބޮޑެތި ގެއްލުންތައް ލިބި މާބޮޑަށް ލަސްވެފައިކަމުގައި ވިދާޅުވިއެވެ.

ފާއިތުވީ ހުކުރު ދުވަހަކީ ރާއްޖޭގެ ބޮޑުބަޔަކަށް ބޯކޮށް ވިއްސާރަކޮށް ފަހުގެ ތާރީޚެއްގައި މަގުތަކުގައި އެންމެބޮޑަށް ފެންބޮޑުވި އެއް ދުވަހެވެ. އެދުވަހު ފ.އަތޮޅުގެ ހުރިހާ ރަށަކަށްވެސް ހުއްޓުމެއްނެތި ބޯކޮށް ވާރޭވެހުމާއި ގުޅިގެން ރަށްރަށުގެ މުވައްސަސާތަކާއި އާންމުން ބައިވެރިވެ ރައްޔިތުންގެ މުދަލާއި ތަންތަން ރައްކާތެރިކުރުމަށް ވަރަށް ގިނައިރު މަސައްކަތް ކުރެއްވިނަމަވެސް ބައެއް ރަށްރަށުގައި ބޮޑެތި ގެއްލުންތައް ރިޕޯޓް ކޮށްފައިވެއެވެ. މި ހާދިސާއިން އެނގިގެން ދިޔައެއްކަމަކީ މިފަދަ ހާދިސާތަކުން ލިބޭ ގެއްލުން ކުޑަކުރުމަށް ރަށްރަށުގެ ލެވެލްގައި ޓާސްކްފޯސްތަކާއި އިންސާނީ ވަސީލަތްތައް ކޮންމެސް ވަރަކަށް ތައްޔާރުނަމަވެސް، ރަށްރަށަށް އިތުރު ވަސީލަތްތައް ހޯދިފައި ނެތްކަމެވެ. ނުވަތަ ކަމާއި ގުޅުންހުރި ފަރާތްތަކުން މިފަދަ ވަސީލަތްތައް ޤާއިމްކޮށް ދިނުމުގައި އިހުމާލު ވެފައިވާކަމެވެ.