އިއްޔެ މެދުރާއްޖެތެރެއަށް ކުރި ބޯ ވިއްސާރާގައި ފ.އަތޮޅުގެ ހުރިހާ ރަށެއްގައި ފެންބޮޑުވެ އެކިވަރުގެ ގެއްލުންތައް ރަށްރަށުން ރިޕޯޓް ކޮށްފައިވީނަމަވެސް، ދަރަނބޫދޫގައި އެފަދަ އެއްވެސް ރިޕޯޓެއް ކޮށްފައި ނެތްކަމަށް ދަރަނބޫދޫ ކައުންސިލްގެ ރައީސް ޢަބްދުލް ޙަމީދު އާދަމް ވިދާޅުވެއްޖެއެވެ.

ބޯކޮށް ވާރޭވެހި ފެންބޮޑުވި އެއްރަށަކީ ދަރަނބޫދޫއެވެ. ވާރޭވެހުން އެއްކޮށް ހުއްޓުނުތާ ގަޑިއިރެއްހާއިރު ފަހުންވެސް ދަރަނބޫދޫގެ ބައެއް މަގުތަކުގައި ދޮޅުފޫޓަށްވުރެ އުސްކޮށް ފެންގަނޑު ހެދިފައި އޮތެވެ. އެހެން ނަމަވެސް، ގޯތިތެރެއަށް ފެންވަދެ އުނދަގޫވާވަރު ވެފައިހުރީ އެންމެ ގެއަކަށްކަމަށާއި އެއީވެސް ފަޅު ގޯއްޗެއްކަމަށް ކައުންސިލް ރައީސް ވިދާޅުވިއެވެ.

މިރަށުން ފާހަގަ ކުރެވުނު ކަމަކީ ފެންބޮޑުވުމާއި ގުޅިގެން މަގުތަކުގައި ހިނގާއުޅެން ދަތިވުން. އާންމުންގެ ގޯތިގެދޮރާއި މުދަލަށް އަދި ވިޔަފާރިތަކަށް ގެއްލުމެއް ލިބިފައިވާކަމުގެ ރިޕޯޓެއް ނެތް ދަރަނބޫދޫ ކައުންސިލްގެ ރައީސް.

ރައީސް ވިދާޅުވީ ފުޅާ ދާއިރާއެއްގައި ދަނޑުވެރިކަން ކުރާ މިރަށުގައި އަންނަ ރޯދަމަހަށް ތައްޔާރުވުމުގެ ގޮތުން ބައެއް ދަނޑުވެރިން ކަރާ އިންދާފައިވާކަމަށާއި، ފެންބޮޑުވުމާއި ގުޅިގެން އެ ދަނޑުވެރިންނަށް ކޮންމެސް ވަރެއްގެ ގެއްލުމެއް ލިބިފައި ހުރެދާނެކަމަށް ބެލެވޭކަމަށެވެ. އެހެންނަމަވެސް މިހާތަނަށް ވާހަކަ ދެކެވުނު ބައެއް ދަނޑުވެރިންގެ ފަރާތުންވެސް އެފަދަ ރިޕޯޓެއް ލިބިފައި ނެތް ކަމަށް ވިދާޅުވިއެވެ.

ކުރިއަށް އޮތް ރޯދަމަހަށް ތައްޔާރުވުމުގެ ގޮތުން ދަނޑުތަކުގައި ކަރާ އިންދުމުގެ މަސައްކަތް ފަށާފައިވާ، އަދި ދަނޑުވެރިކަމުގައި ގިނަ ދުވަސްތަކެއް ވަންދެން މަސައްކަތް ކުރައްވަމުން ގެންދަވާ ޢަލީ މަޙްމޫދު (ޚަޒާނާ އަލިބެ) ދަނިއުސްއަށް މަޢުލޫމާތު ދެއްވި ގޮތުގައި އޭނާވަނީ ކަރާ ހެއްދުމަށް ގާތްގަނޑަކަށް 81 ވަޅުގަނޑު ޖަހާފައިކަމަށާއި، އެތަނުން ވެޔޮތައް ހެދި ބޮޑުވެފައިނުވިނަމަވެސް ފެންބޮޑުވުމާއި ގުޅިގެން ވަޅުތައް ބެދި ގެއްލުން ވެފައިވާކަމަށެވެ. އެހެންކަމުން ވަޅުތައް އަލުންތައްޔާރުކޮށް ރޯދައަށް ކަރާ ހެއްދުމުގެ މަސައްކަތް އަލުން ފެށުމަށް ތައްޔާރުވަމުން އަންނަކަމަށް އަލިބެ މަޢުލޫމާތު ދިނެވެ.

އަލިބެ އިތުރަށް ވިދާޅުވި ގޮތުގައި ކުރިން ފަހަރެއްގައިވެސް މޫސުން ގޯސްވެ ވައިގަދަވުމުގެ ސަބަބުން ރަށުގެ އެކި ދަނޑުވެރިންގެ ދަނޑުތަކުން ގިނަ ޢަދަދަކަށް ފަޅޯ ގަސްތަކެއް ބިނދި މާލީގޮތުން ވަރަށް ބޮޑު ގެއްލުންތަކެއް ލިބުމުން އެކަން ކަމާއި ގުޅުންހުރި ފަރާތްތަކަށް ރިޕޯޓް ކުރެވުނުކަމަށެވެ. އެކަމަކު އެފަހަރުވެސް އެއްވެސް ފަރާތަކުން އެހީތެރިކަމެއް ފޯރުކޮށް ދީފައިނުވާތީ އެކަމާއި ވަރަށް މާޔޫސްވިކަމަށާއި، މިފަހަރުގެ ގެއްލުންތައް ރިޕޯޓު ނުކުރީ ރިޕޯޓްކޮށްގެން ވަކި ރަނގަޅުގޮތެއް ވާތަން ނުފެންނާތީކަމުގައެވެ.

އިއްޔެގެ ވިއްސާރައާއި ގުޅިގެން ފ.އަތޮޅުގެ ހުރިހާ ރަށެއްގައި ފެންބޮޑުވެ، އެރަށްރަށުގެ މުވައްސަސާތަކާއި އާންމުން ގުޅިގެން ފެން ހިންދުމަށް ވަރަށް ގިނައިރު ގިނަ މަސައްކަތްތަކެއް ކުރަންޖެހިފައިވެއެވެ. އެހެންނަމަވެސް، އެއްވެސް ބައެއްގެ އެހީތެރިކަން ހޯދަން ނުޖެހި ދަރަނބޫދޫގައި ބޯކޮށް އުފެދުނު ފެންގަނޑުތައް މާގިނައިރުތަކެއް ނުވެ އަމިއްލައަށް ހިނދިގެން ގޮސްފައިވާކަމަށް ދަރަނބޫދޫ ކައުންސިލްގެ ރައީސް ފާހަގަކުރެއްވިއެވެ.