މެދުރާއްޖެތެރެއަށް ރެއިން ފެށިގެން ކުރަމުން އައި ވިއްސާރައިގައި ފ. ފީއަލީގައިވެސް ފެންބޮޑުވެފައިވާކަމަށް އެރަށު ކައުންސިލުން ދަނިއުސްއަށް މަޢުލޫމާތު ދީފިއެވެ.

މި ވިއްސާރައިގައި މިހާތަނަށް ގެއްލުން ލިބިގެން ކައުންސިލަށް ރިޕޯޓު ކޮށްފައިވަނީ އެންމެ ފަރާތާކުން ނަމަވެސް، އެރަށު ބޮޑު ސަރަޙައްދެއްގައި ވަރަށް ބޮޑަށް ފެންބޮޑުވެފައިވާކަމަށް މަޢުލޫމާތު ލިބެއެވެ.

ރަށުތެރޭގައި ބޮޑުވެފައިވާ ފެންގަނޑު ހިންދާލުމަށް ރަށުކައުންސިލުން ކުރައްވަމުން ގެންދަވާ މަސައްކަތުގައި ފުލުހުންނާއި އެމްޓީސީސީގެ އިތުރުން ރަށުގެ ހުރިހާ މުވައްސަސާތަކާއި އާންމު ރައްޔިތުންގެ ވަރަށް ބޮޑު އެއްބާރުލުމެއް ލިބެމުން އަންނަކަމަށް ކައުންސިލުން ވިދާޅުވިއެވެ.

ފެން ހިންދާލުމުގެ މަސައްކަތް ކުރެވެމުންދާތާ ގިނައިރުތަކެއް ވީނަމަވެސް އަދި %50 ފެން ހިންދާލެވިފައިނުވާކަމަށް އެރަށުން މަޢުލޫމާތު ލިބެއެވެ. އެރަށުން ލިބިފައިވާ ބައެއް ފޮޓޯތަކަށް ބަލާލާއިރު ބޯޅަ ދަނޑާއި އެ ސަރަޙައްދުވަނީ ވަރަށް ބޮޑަށް ފެން އުފެދިފައެވެ.

މިހާރު ކުރަމުން މިދާ ވިއްސާރައިގައި ފ.އަތޮޅުގެ ހުރިހާ ރަށެއްގައިވެސް ވަނީ ވަރަށް ބޮޑަށް ފެން ބޮޑުވެފައެވެ. ރާއްޖޭގެ މޫސުމާއި ބެހޭ އިދާރާއިން މިހާރުވަނީ ފ. އަތޮޅު ހިމެނޭ ސަރަޙައްދަށް އޮރެންޖު އެލާޓު ނެރެފައެވެ.