ރާއްޖެއަށް މިހާރު ކުރަމުންދާ ވިއްސާރައިގައި ފ. މަގޫދޫގައިވެސް ފެންބޮޑުވެ އެތައް ގެއްލުންތަކެއް ވެއްޖެއެވެ.

ވިއްސާރައިގައި މަގޫއަށް ލިބިފައިވާ ގެއްލުންތަކުގެ ފޮޓޯތަކާއި ވީޑިއޯތައް މީސްމީޑިއާގައިވަނީ ދަރުވާން ފަށާފައެވެ. އެ މަންޒަރުތަކަށް ބަލާއިރު ސްކޫލު ސަރަޙައްދުގަޔާއި ބޯޅަ ދަނޑު ހިސާބުގައިވެސް ވަރަށް ބޮޑަށް ފެންބޮޑުވެފައިވެއެވެ. އެރަށު ބަނދަރުމަތީ ހަދާފައިހުރި ހަޓެއް ބިންގަނޑު ކަނޑައިގެން ދިއުމާއި ގުޅިގެން ވެއްޓިފައިވާކަމަށް މަޢުލޫމާތު ލިބެއެވެ. މީގެ އިތުރުން ރަސްމީ ބޮޑު މިސްކިތް ކައިރީގައިވެސް ވަނީ ވަރަށް ބޮޑަށް ފެން ހެދިފައެވެ.

މަގޫދޫ ފެން ބޮޑުވި ހާދިސާފގައި ލިބިފައިވާ އެހެން ފޮޓޯތަކަށް ބަލާއިރު އެރަށު އާންމު ގޭގެއަށް ވަރަށް ބޮޑަށް ފެން ވަދެފައިވެއެވެ. އެގޮތުން ބައެއް ގޭގެ ކޮޓަރިތެރެއަށް ބޯކޮށް ފެންވަދެ ފަރުނީޗަރުތަކަށްވެސް ގެއްލުން ލިބިފައިވާ ފޮޓޯތަކެއް އަންނަނީ ދައުރުވަމުންނެވެ.

މަގޫދޫގައި ހެދިފައިވާ ފެންގަނޑު ހިންދާލުމުގެ މަސައްކަތުގައި ފ.އަތޮޅު ފުލުންނާއި އެރަށުގެ މުވައްސަސާތަކާއި އާންމު ރައްޔިތުން ގެންދަނީ ބައިވެރިވަމުންނެވެ.

ވިއްސާރައިގެ ސަބަބުން މަގޫދޫއަށް ލިބިފައިވާ ގެއްލުމުގެ އަދާހަމައެއް ހޯދާލުމަށް އެރަށު ކައުންސިލްގެ އެސްޖީ އިބްރާހީމް އަށް ގުޅާލުމުން ވިދާޅުވީ، ރަށުތެރޭގައި ޕަމްޕު ޖަހައިގެން ފެން ހިންދުމުގެ މަސައްކަތް ބާރު ސްޕީޑުގައި ކުރިއަށް ދާކަމަށާއި، މިހާތަނަށް ގާތްގަނޑަކަށް %50 އާއި ގާތްކުރާ ވަރަކަށް ފެންގަނޑު ހިންދާލެވިއްޖެ ކަމުގައެވެ. ފެންބޮޑުވެފައިވާ އެކި ހިސާބުތަކުން ސީދާ ގެއްލުން ލިބުނީ ކިތައް ގެއަށްކަމެއް އަދި ބުނަން ނޭނގޭކަމަށް ސެކްރެޓަރީ ޖެނެރަލް ވިދާޅުވިއެވެ.

ރާއްޖެއަށް މިހާރު ކުރަމުންދާ ވިއްސާރައިގައި ބޮޑެތި ގެއްލުންތަކެއް ލިބިގެން ޑިޒާސްޓަރ މެނޭޖްމަންޓް އޮތޯރިޓީއަށް ރިޕޯޓުކޮށްފައިވާ ރަށްތަކުގެ ތެރޭގައި ފ. މަގޫދޫވެސް ހިމެނެއެވެ.