ކ. ކާށިދޫ ކޯޓުގެ އިސްމެޖިސްޓްރޭޓްކަމަށް ފ. ދަރަނބޫދޫ ރޯޝަނީގެ އަލްއުސްތާޛު ޢަލީ އިސްމާޢީލް ޢައްޔަން ކުރައްވައިފިއެވެ.
ޝަރުޢީ ދާއިރާގައި 4 އަހަރަށްވުރެ ގިނަ ދުވަހުގެ ތަޖުރިބާ ލިބިފައިވާ އުސްތާޛް ޢަލީ އިސްމާޢީލް ވަނީ ދިވެހިރާއްޖޭގެ ޤައުމީ ޔުނިވާސިޓީއިން ބެޗްލަރ އޮފް ޝަރީއާ އެންޑް ލޯ އަދި އިސްލާމިކް ޔުނިވާސިޓީ އޮފް މޯލްޑިވްސްއިން މާސްޓާރ އޮފް ލޯސް (ކޮމްޕަރޭޓިވް ޖުރިސްޕްރޫޑެންސް) އާއި މާސްޓަރ އޮފް ޖުޑީޝަލް ސައިންސް އެންޑް ޝަރީޢާ ޕޮލިސީ ޙާސިލް ކުރައްވާފައެވެ.
އަތޮޅު ތެރޭގެ ބައެއް ކޯޓުތަކަށް ފަނޑިޔާރުން ޢައްޔަން ކުރައްވާފައިވާކަން ހާމަކޮށް ޖުޑީޝަލް ސާވިސް ކޮމިޝަނުންވަނީ މިމަހުގެ 22 ވަނަ ދުވަހު ނޫސް ބަޔާނެއް ނެރުއްވާފައެވެ. ކާށިދޫ ކޯޓުގެ އިސް މެޖިސްޓްރޭޓަކަށް އުސްތާޛް ޢަލީ ޢައްޔަނު ކުރެއްވިއިރު ހުންނެވީ އެޓާރނީ ޖެނެރަލް އޮފީހުގެ ސްޓޭޓް އެޓާރނީ ކަމުގެ މަޤާމުގައެވެ.
އުސްތާޛް ޢަލީ އިސްމާޢީލަކީ 2023 އޭޕްރީލް މަހުން ފެށިގެން ދިވެހިރާއްޖޭގެ މީޑިއާ ކައުންސިލްގެވެސް މެމްބަރުކަން ކުރައްވަމުން ގެންދަވާ ފަރާތެކެވެ. އެހެންނަމަވެސް ކޯޓުގެ ފަނޑިޔާރުކަމަށް ޢައްޔަނު ކުރެވުމާއެކު ޢަލީ ވަނީ މީޑިއާ ކައުންސިލްގެ މެމްބަރު ކަމުން އިސްތިއުފާ ދެއްވާފައެވެ.
