ދަރަނބޫދޫ ތުނޑި ފަތުރުވެރިކަމަށް ކުއްޔަށް ދިނުމާއި ދެކޮޅަށް އެރަށު ޒުވާނުން ނިކުމެ ކައުންސިލަށް ޕެޓިޝަނެއް ހުށަހަޅައިފިއެވެ. މި ޕެޓިޝަން ކައުންސިލަށް ހުށަހަޅާފައިވަނީ އިއްޔެގެ ވަގުތެއްގައެވެ.
ލޯކަލް ޓޫރިޒަމަށް ދަރަނބޫދޫއިން ބިން ކަނޑައަޅައި އެ މަސައްކަތް ފެށުމަށް އެންމެ ފުރަތަމަ އުފެދުނު ރަށު ކައުންސިލުންވެސް މަސައްކަތްތަކެއް ކޮށްފައިވެއެވެ. އަދި ދަރަނބޫދޫގައި ފަތުރުވެރިކަން ތަޢާރަފްކޮށް ކުރިއެރުވުމަށް އެކި އަހަރުތަކުގެ މަތީން ގިނަ ޖަލްސާތަކެއް ރަށުކައުންސިލުން ބާއްވާފައިވެއެވެ. އަދި ލޯކަލް ޓޫރިޒަމް ވިޔަފާރީގެ ތަޖުރިބާ ހޯދުމަށް ރަށު ކައުންސިލުން ވަނީ މީގެކުރިން ރާއްޖޭގައި ގެސްޓްހައުސް ވިޔަފާރި ކުރާ އެކިއެކި ފަރާތްތަކާ ބައްދަލުވެސް ކޮށްފައެވެ.
ދަރަނބޫދޫ ކައުންސިލުންވަނީ މިދިޔަ ހަފްތާގައިވެސް މިކަމާއި ގުޅުންހުރި ބައްދަލުވުމެއް އާންމުކޮށް ހުޅުވާލައިގެން ބާއްވާފައެވެ. އަދި މިކަމަށް ޚިޔާލުހޯދުމަށް ރަށުން ބޭރުގައި ދިރިއުޅޭ ދަރަނބޫދޫ ރައްޔިތުންނަށް ޚާއްސަކޮށްގެން އޮންލައިން ބައްދަލުވުމެއްވެސް ހަމަ އެދުވަހުގައި ބާއްވާފައިވެއެވެ.
ފަތުރުވެރިކަމަށް ތުނޑި ދޫކުރުމާއި ދެކޮޅަށް މަސައްކަތް ކުރާ ޒުވާނުންގެ އެންމެ ބޮޑު ކަންބޮޑުވުމަކީ ލޯކަލް ޓޫރިޒަމުން ރަށާއި މުޖުތަމަޢުއަށް ނުރަނގަޅު އަދި ގެއްލުންހުރި އަސަރުތަކެއް ކުރުންކަމުގައި ޕެޓިޝަންގައި ފާހަގަކޮށްފައިވެއެވެ. އަދި ޕެޓިޝަންގެ ބޭނުމަކީ ތުނޑި ސަރަޙައްދު ފަތުރުވެރިކަމަށް ކުއްޔަށް ދިނުމާއި ދެކޮޅު ހެދުންކަމަށާއި، ތުނޑި ފަތުރުވެރިކަމަށް ދޫކުރުމަށް ދަރަނބޫދޫގެ މެޖޯރިޓީ ރައްޔިތުން އިއްތިފާޤު ނުވާކަމަށް ޕެޓިޝަންގެ މަސައްކަތުގައި އިސްކޮށް އުޅުއްވާ ފަރާތްތަކުން މަޢުލޫމާތު ދެއެވެ.
ޒުވާނުން އިސްވެ ޕެޓިޝަނެއް ތައްޔާރުކޮށް ކައުންސިލަށް މިހާރު ހުށަހަޅާފައިވާއިރު، މި ޕެޓިޝަނުގައި ޖުމުލަ 84 މީހުން ސޮއިކޮށްފައިވެއެވެ. މީގެތެރެއިން 65 މީހުންނަކީ މިވަގުތު ރަށުގައި ދިރިއުޅެމުންދާ ފަރާތްތައް ކަމަށާއި، ބާކީ ތިބި ފަރާތްތަކަކީ ރަށުން ބޭރުގައި ތިބި ފަރާތްތައްކަމުގައި މަޢުލޫމާތު ލިބެއެވެ. ޕެޓިޝަންގެ މަސައްކަތުގައި އުޅުއްވި ބޭފުޅުން ވިދާޅުވި ގޮތުގައި ރަށުން ބޭރުގައި ތިބި ފަރާތްތަކުގެ ސޮއި ހޯދާފައިވަނީ އެފަރާތްތަކަށް ގުޅައިގެން ހުއްދަ ލިބިގެންނެވެ.
ދަރަނބޫދޫގެ ތުނޑި ފަތުރުވެރިކަމަށް ދޫކުރުމަށް ދެކޮޅު ހަދާ ފަރާތްތަކުގެ އެންމެ ބޮޑު ޑިމާންޑަކީ އެ މައްސަލައާއި ގުޅިގެން ރައްޔިތުންގެ މެދުގައި އަލުން ވޯޓެއް ނެގުމެވެ. އަދި ވޯޓު ނަގާއިރު ވީހާވެސް ގިނަ ރައްޔިތުންނަށް ބައިވެރިވެވޭނެ ގޮތަކަށް އިންތިޒާމް ކުރެއްވުމަށާއި، ވީހާވެސް ހާމަކަން ބޮޑުގޮތެއްގައި ކުރިއަށް ގެންދިއުމަށް ގޮވާލާފައިވެއެވެ.
ދަރަނބޫދޫ ކައުންސިލުންވަނީ އެރަށުގެ ހުޅަނގު ކޮޅުން 50 ފޫޓު ފުޅާ، 100 ފޫޓު ދިގު ޖުމުލަ 5000 އަކަފޫޓުގެ 3 ބިން، ގެސްޓް ހައުސް ވިޔަފާރި ކުރުމަށް ކުއްޔަށް ދޫކުރުމަށް ބިޑަށް ހުޅުވާލާފައެވެ. މިކަމަށް ޝަޢުޤުވެރިކަން ހުރި އިންވެސްޓަރުން މިހާރުވެސް ކައުންސިލުން މަޢުލޫމާތު ހޯދަމުންދާކަން ދަނިއުސްއަށްވަނީ މަޢުލޫމާތު ލިބިފައެވެ.
ދަރަނބޫދޫ ޒުވާނުން އިސްނަގައި ހުށަހެޅި މި ޕެޓިޝަނާއި ގުޅިގެން ކައުންސިލުން އަދި ރަސްމީކޮށް ގޮތެއް ނިންމާފައި ނުވިނަމަވެސް، ބެލެވޭ ގޮތުގައި މިކަން ކައުންސިލްގެ ޖަލްސާއަކަށް ވަރަށް އަވަހަށް އެޖެންޑާކުރެވިގެން ދާނެއެވެ.
One Response
Naathahuzeebu kamuge laamaseelu misaalu dhahkamundhaa rayyithaku dhiriulhay rashah.
Theega iskoh ulhay meehunnakee rashuga dhiriulhen hiyaalu kohfavaa baeh noon.Rashuga dhiriulhen visnaa bayfulhun 5-10 aharu therapy rashun faiban ready vay😂😂