ވަޒީފާތަކަށް ހުށަހެޅުމަށާއި އެކި ބޭނުންތަކަށް ތަޢުލީމީ ސެޓްފިކެޓްތަކާއި ޓްރާންސްކްރިޕްޓާއި އެހެނިހެން ލިޔުންތަކުގައި ޖަހަންޖެހޭ އަސްލާއި އެއްގޮތްކަމުގެ ތައްގަނޑު (އެޓެސްޓޭޝަން ތައްގަނޑު) ޖަހައި ދިނުމުގެ ޚިދުމަތް ފ. ދަރަނބޫދޫއަށް ނިސްބަތްވާ އެންމެނަށް އެއްވެސް އަގަކާއިނުލައި ކޮށްދެން ނިންމާފައިވާކަމަށް ޤާނޫނީ ވަކީލު އުސްތާޛް ޢަލީ އިސްމާއިލް (ރޯޝަނީ އައްޔަ) ވިދާޅުވެއްޖެއެވެ.
އަސްލާއި އެއްގޮތް ކަމުގެ ތައްގަނޑުތައް ޖަހައިދިނުމަކީ ކޯޓްތަކުގައި ވަކާލާތު ކުރުމުގެ ހުއްދަ ލިބިފައިވާ ޤާނޫނީ ވަކީލުންނަށް ފޯރުކޮށް ދެވޭ ގޮތަށް އޮންނަ ޚިދުމަތެކެވެ. މި ޚިދުމަތުގެ އަގުތަކަށް ބަލާއިރު އާންމުކޮށް އެންމެ ހެޔޮ އަގުގައި ތައްގަނޑު ޖަހައިދެނީ ސަފްޙާ އަކަށް 10ރ ނުވަތަ 15 ރުފިޔާގެ ރޭޓުންނެވެ.
އަސްލާއި އެއްގޮތްކަމުގެ ތައްގަނޑު ޖަހައިދިނުމުގެ އިތުރުން އެކިއެކި ބޭނުންތަކަށް ކުށުގެ ރެކޯޑް ސާފުކުރުމަށް އެހީތެރިކަން ބޭނުންވާ ބޭފުޅުންނަށް އެކަމުގައިވެސް އެހީތެރިކަން ފޯރުކޮށް ދެއްވާނެކަމަށް ޢަލީ ވިދާޅުވިއެވެ.
މިކަމާއި ގުޅިގެން ދަނިއުސްއަށް އިތުރަށް މަޢުލޫމާތު ދެއްވަމުން ޢަލީ ފާހަގަ ކުރެއްވި ގޮތުގައި ޤާނޫނު ނަމްބަރު 2019/5 (ދިވެހިރާއްޖޭގެ ޤާނޫނީ ފަންނުގެ ޤާނޫނު) ދަށުން ދިވެހިރާއްޖޭގެ ބާ ކައުންސިލުން އެޓެސްޓް ކުރުމުގެ ޚިދުމަތް ރެގިއުލޭޓް ކުރުމުގެ ގޮތުން ހަރުދަނާ އުސޫލުތަކެއް އެކުލަވާލާފައިވާކަމަށާއި، އެގޮތުން ޚާއްސަކޮށް ވަކީލުން އެޓެސްޓޭޝަން ތައްގަނޑު ޖަހައިދޭ ސެޓްފިކެޓްތަކާއި އެނޫންވެސް ލިޔެކިޔުންތަކުގެ އަސްލު އޮތްތޯ ކަށަވަރުކުރަން ވަކީލުންނަށް ލާޒިމްކަމަށެވެ.
“އެޓެސްޓް ކުރެވޭ ލިޔުންތަކުގެ އަސްލު އޮތްކަން ޔަގީންކުރުމަށް އިތުރު ސަމާލުކަމެއް ދޭންޖެހޭނެ. ތައްގަނޑު ޖަހައިދެވޭނީ އެކަން ކަށަވަރު ކުރުމަށްފަހު” ލޯޔަރު ޢަލީ އިސްމާއިލް.
މީގެ އިތުރުން އެކިއެކި އެގްރީމެންޓްތައް ނޮޓޮރައިޒް ކުރުމަށް ބޭނުންވާ ދަރަނބޫދޫ ރައްޔިތުންނަށްވެސް އެޚިދުމަތް ހިލޭ ކޮށްދިނުމަށް މަސައްކަތް ކުރަމުން އަންނަ ކަމުގައި ޢަލީ ވިދާޅުވިއެވެ. އެގޮތުން އެގްރީމެންޓްތަކާއި ބިދޭސީން ގެންނައިރު ކޯޓާއަށް އެދި ހުށަހަޅާ ފޯމްތަކުގައި ތައްގަނޑު ޖަހައި ދިނުން ފަދަ ޚިދުމަތްތައްވެސް ލިބިގެންދާނެއެވެ. މި ޚިދުމަތަކީ ރާއްޖޭގައި އާންމުކޮށް ސަފްޙާއަކަށް 500ރ އާއި 1000ރ އާއިދެމެދުގެ އަގެއް ނަގާ ޚިދުމަތެކެވެ.
މި ޚިދުމަތް ހޯދުމަށް ބޭނުންވާ ފ، ދަރަނބޫދޫ އަށް ނިސްބަތްވާ ބޭފުޅުން ޢަލީ އިސްމާޢިލްއާއި ގުޅުއްވައިގެން ކުރިއަށް ދެވޭނެކަމަށް އެބޭފުޅާ ވިދާޅުވިއެވެ.
