މިހާރު މާލޭގައި ކުރިއަށްދާ މައިލޯ ޗެމްޕިއަންޝިޕްގައި ވާދަކުރަމުންދާ ފ. ދަރަނބޫދޫ އެޗްވައިއެސްސީ އެކަޑެމީގެ 12 އަހަރުން ދަށުގެ ޓީމު، މާލޭގެ ޚާއްސަ ބިނާތަކަށް ޒިޔާރަތްތަކެއް ކުރަން ފަށައިފިއެވެ.

މައިލޯ ޗެމްޕިއަންޝިޕްގައި ދަރަނބޫދޫ ތަމްސީލް ކުރުމަށް 18 ކުދިންގެ ޓީމެއް ދަރަނބޫދޫއިން ފުރާފައިވަނީ މިދިޔަ އަންގާރަ ދުވަހުގައެވެ. މި ޓީމާއެކު އެކުދިންގެ ބައެއް ބެލެނިވެރިންވެސް ގެންދަނީ ޒިޔާރަތްތަކުގައި ބައިވެރިވަމުންނެވެ.

ދަރަނބޫދޫގެ 12 އަހަރުން ދަށުގެ ޓީމު އެންމެ ފުރަތަމަ ޒިޔާރަތް ކޮށްފައިވަނީ ކިންގ ސަލްމާން މިސްކިތަށެވެ. އެކުދިން މިސްކިތަށް ކޮށްފައިވާ ޒިޔާރަތުގައި މިސްކިތް ބަލާލުމުގެ އިތުރުން، މިސްކިތުގައި އެކުދިންނަށްވަނީ ދީނީ ދަރުހެއް ކުރިއަށް ގެންދެވިފައެވެ. މި ދަރުހުގައި ނަމާދު ކުރުމުގެ މުހިންމުކަމާއި، ނަމާދާއި ވުޟޫ ކުރުމުގެ އެންމެ ރަނގަޅު ގޮތްތައް އެކުދިންނަށް ބުނެދެއްވާފައިވެއެވެ. މި ދަރުސް ކުރިއަށް ގެންދެވީ ސަލްމާން މިސްކިތުގެ އިމާމް ޝެއިޚް އަމްމާރެވެ. މިއީ އެޗްވައިއެސްސީ އެކަޑެމީ ދަރަނބޫދޫގައި ހިންގާ ޚައިރު ފައުންޑޭޝަނުން، މިނިސްޓްރީ އޮފް އިސްލާމިކް އެފެއާޒުގެ އެހީތެރިކަމާއެކު ކުރިއަށް ގެންގޮސްފައިވާ އިވެންޓެކެވެ.

މާލޭގެ ޚާއްސަ ތަންތަނަށް ކުރަމުން ގެންދާ ޒިޔާރަތުގައި މި ޓީމުގެ ކުދިން ދެން ޒިޔާރަތް ކޮށްފައިވަނީ ޤައުމީ ދާރުލް އާސާރަށެވެ. ދިވެހިރާއްޖޭގެ ތާރީޚާއި ގުޅުންހުރި ވަރަށް މުހިންމު މަޢުލޫމާތާއި ތަކެތި ދައްކާލުމަށް ބަހައްޓާފައިހުންނަ މި ބިނާއަށް ކުދިންނާއެކު ބެލެނިވެރިންވެސް ޒިޔާރަތް ކޮށްފައިވެއެވެ.

މި ކުދިން ދާރުލް އާސާރަށް ކުރެއްވި ޒިޔާރަތުގައި ދިވެހި ބަހާއި ސަޤާފަތާއި ތަރިކައާއި ބެހޭ ވަޒީރު އާދަމް ނަސީރު އިބްރާހީމްވަނީ ކުދިންނާއެކު އަގުހުރި ވަގުތުކޮޅެއް ހޭދަކުރައްވާފައެވެ.

މައިލޯ އެކަޑެމީ ޗެމްޕިއަންޝިޕް 2024 ގައި ދަރަނބޫދޫ ތަމްސީލުކުރާ އެޗްވައިއެސްސީ ހިންގާ ޚައިރު ފައުންޑޭޝަންގެ މީސްމީޑިއާ ހޭންޑަލްގައި މިކުދިންގެ ޙަރަކާތްތަކުގެ މަޢުލޫމާތު އަންނަނީ ހިއްސާ ކުރަމުންނެވެ. ޚައިރު ފައުންޑޭޝަނަކީ ކުޅިވަރުގެ ތެރެއިން ކުދިންނަށް އަޚުލާޤާއި ހުނަރު ދަސްކޮށްދީ ހެޔޮކަންކަމަށް ވާގިވެރިވުމަށް ބާރުއެޅުމަށް މަސައްކަތް ކުރުމުގެ ނިޔަތުގައި ނިމިދިޔަ އަހަރު ރަޖިސްޓްރީ ކޮށްފައިވާ ޖަމްޢިއްޔާއެކެވެ.