ވިހިވަނަ ރައްޔިތުންގެ މަޖިލީހުގެ ނިލަންދޫ ދާއިރާގެ އިންތިޚާބު ކާމިޔާބުކުރެއްވި ފާތިމަތު ސައުދާ، ކާމިޔާބީ ފާހަގަކޮށް ރައްޔިތުންނާއި ބައްދަލު ކުރެއްވުމަށް މިއަދު ދަރަނބޫދޫއަށް ވަޑައިގަންނަވައިފިއެވެ. ނިލަންދޫ ދާއިރާގެ ދެރަށަށްވެސް ވަޑައިގަތުމަށް ހަމަޖެހިފައިވާ މިދަތުރުފުޅުގައި ދަރަނބޫދޫއަށް ވަޑައިގެންފައިވަނީ މިއަދު ހެނދުނުގައެވެ.
އިންތިޚާބަށްފަހު ދާއިރާއަށް ކުރައްވާ ފުރަތަމަ ދަތުރުފުޅު ދަރަނބޫދޫއަށް ހަމަޖެހިފައިވުމާއި ގުޅިގެން ރަށުގެ ވަރަށް ގިނަ ރައްޔިތުންވަނީ ގަދަ އަވީގައި ބަނދަރަށް ދުރުވެ އެކަމަނާއަށް ރަތްދޫލައިގެ މަރުހަބާއެއް ދަންނަވާފައެވެ. މި ދަތުރުފުޅުގައި އެކަމަނާގެ އާއިލާގެ ބޭފުޅުންވެސް ބައިވެރިވެފައިވެއެވެ.
ފޮޓޯ ގެލެރީ ލިންކް ބަލާލުމަށް ފިއްތާލައްވާ | އެފްބީ – ދަނިއުސް
މި ދަތުރުފުޅުގައި ރަށުގެ ހުރިހާ ގޭގެއަށް އެކަމަނާގެ ޓީމުން ގެންދަވަނީ ޒިޔާރަތް ކުރައްވަމުންނެވެ. ކުރިއަށް އޮތް މަޖިލީހަށް އިންތިޚާބުކޮށް ދެއްވާފައިވުމާއި ގުޅިގެން އެކަމަނާގެ ފަރާތުން ރަށު ރައްޔިތުންނަށް މިއަދު ހަވީރު ސައިފޮދެއް ދިނުމަށްވެސް ހަމަޖެހިފައިވެއެވެ.
ދަރަނބޫދޫއަށް ކުރެއްވި ދަތުރުފުޅު ނިންމަވާލެއްވުމަށްފަހު އެކަމަނާ ނިލަންދޫއަށް ވަޑައިގަތުމަށް ހަމަޖެހިފައިވަނީ މިއަދު ހަވީރުގެ ވަގުތެއްގައެވެ. އެކަމަނާއަށް ލިބުނު ކާމިޔާބީގެ އުފާ ފާޅުކުރުމަށް ދާއިރާގެ ދެރަށުގައިވެސް މިރޭ ހަވާއެރުވުމަށް ހަމަޖެހިފައިވާއިރު، މާދަމާ ރޭ ނިލަންދޫގައި ޚާއްސަ ޖަލްސާއެއްވެސް ބޭއްވުމަށްވަނީ ހަމަޖެހިފައެވެ.
އިންތިޚާބަށްފަހު ފުރަތަމަ ފަހަރަށް ސައުދާ ދަރަނބޫދޫއަށް ވަޑައިގެންނެވުމުން ރައްޔިތުންގެ މޫނުމަތިންވަނީ ހިނިތުންވުމާއި އުފާވެރިކަން ދައްކައިދީފައެވެ.
