ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ޕްރޮގްރެސިވް ކޮންގްރެސް ކޯލިޝަންގެ ޕްރައިމަރީގައި ވާދަކުރުމަށް ފޯމު ހުށަހެޅި އަހްމަދު ރަޝީދުގެ ނަން ނަގައި، ޕްރައިމަރީގައި ވާދަނުކުރަން ނިންމައިފިއެވެ. އެކަން އޭނާވަނީ ދަނިއުސްއަށް ކަށަވަރު ކޮށްދެއްވާފައެވެ.
އަހުމަދަކީ ޕީޕީއެމްގެ ނިލަންދޫ ދާއިރާގެ ރައީސެވެ. އޭނާވަނީ ވަރަށް ކުރިން މަޖިލިސްއަށް ކުރިމަތިލާކަމަށް އިއުލާނުކޮށް ވަރަށް ކުރިން ކެމްޕެއިންވެސް ފައްޓަވާފައެވެ. އެހެންނަމަވެސް، ރައީސް ޑރ. މުޢިއްޒުގެ ކޮއްކޯފުޅު ފާތުމަތު ސައުދާ ނިލަންދޫ ދާއިރާއަށް ޕީއެންސީގެ ފަރާތުން ކުރިމަތިލައްވާކަން އިއުލާނު ކުރެއްވުމާއެކު އަހުމަދުގެ ކެމްޕެއިންވަނީ ވަރަށް ބޮޑަށް މަޑުޖެހިފައެވެ. ކުރިން އަހުމަދަށް ކެމްޕެއިން ކުރެއްވި ބައެއް އިސް ފަރާތްތައްވެސް ފަހުންވަނީ އޭނާ ދޫކުރައްވާ ވާދަވެރި ކެންޑިޑޭޓާއި ގުޅިވަޑައިގެންފައެވެ.
ޕްރައިމަރީގެ ފޯރި އެންމެ ގަދަވަމުން ދިޔަ ދުވަސްތަކުގައި އަހުމަދުގެ ނަން ނަގާނެކަމަށް ގިނަބަޔަކު ބުނަމުން ދިޔަނަމަވެސް، އޭނާ ދިޔައީ އެގޮތަށް ބުނަމުން ގެންދެވި ފަރާތްތަކަށް އެކަން އެގޮތަށް ނުވާނެކަމަށާއި، ޑރ. މުޢިއްޒުގެ ކެންޑިޑޭޓެއްގެ ގޮތުގައި ސާބިތުވެހުންނެވި ކަމުގެ ޔަގީންކަން ދެއްވަމުންނެވެ. އަދި ފަސޭހަކަމާއެކު ޕްރައިމަރީ ކާމިޔާބު ކުރައްވާނެކަމަށް ހާމަކުރައްވަމުން ގެންދެވިއެވެ.
ޕްރައިމަރީގައި ވާދަނުކުރަން ނިންމެވި ސަބަބެއް ހޯދުމަށް ދަނިއުސް ޓީމުން އަހުމަދަށް މެސެޖް ކުރިނަމަވެސް، އެ މެސެޖްތަކަށް އޭނާ ޖަވާބުދީފައި ނުވެއެވެ. މީސްމީޑިއާގައި ބައެއް ފަރާތްތަކުން ބުނަމުން ދާގޮތުގައި އަހުމަދު ނަން ނަގާފައިވަނީ ޕްރައިމަރީގައި ވޯޓުލެވޭ ފަރާތްތަކުގެ ލިސްޓު ޕާޓީތެރެއިން އޮޅުވާލާފައިވާކަމަށް ތުހުމަތު ކުރެވެން ފެށުމުންނެވެ.
ޕްރައިމަރީން އަހުމަދު ވަކިވުމާއެކު އޭނާ އަމިއްލަގޮތުން މަޖިލީހަށް ވާދަކުރާނެކަމަށްވެސް ގިނަބަޔަކު އަންނަނީ ބުނަމުންނެވެ. އެހެންނަމަވެސް އެކަމާއި ބެހޭގޮތުން ދަނިއުސްއިން ކުރި ސުވާލުތަކަށްވެސް އަހުމަދު އެއްވެސް ޖަވާބެއް ދެއްވާފައި ނުވެއެވެ. އަދި އޭނާ ދެން ވާދަކުރާނީ ރައީސް ޔާމިންގެ ޕީއެން.އެފްގެ ޓިކެޓްގައިކަމަށް ބައެއް ފަރާތްތަކުން ދައްކަމުން ގެންދާ ވާހަކަތަކުގައި އެއްވެސް ހަގީގަތެއް ނެތްކަމަށް އަހުމަދުވަނީ ބުނެފައެވެ.
