މިއަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި ޕްރޮގްރެސިވް ކޮންގްރެސް ކޯލިޝަންގެ ފަރާތުން ވާދަކުރާ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީގައި ވޯޓުލެވޭ މީހުންގެ ލިސްޓް އެ ކޯލިޝަނުން އާންމުކުރިއިރު، ލިސްޓުގައި އުމުރުން 14 އަހަރުގެ ކުއްޖެއްގެ ނަން ހިމަނާފައިވާ މައްސަލައެއް ފެންމަތިވެއްޖެއެވެ.  މި މައްސަލަ ފާހަގަކުރެވިފައިވަނީ ނިލަންދޫ ދާއިރާގެ ޕްރައިމަރީގައި ވޯޓުލެވޭ ލިސްޓުގައެވެ.  މި ލިސްޓު ޕީއެންސީގެ ވެބްސައިޓުގައި މިހާރުވެސް ފެންނަން އެބައޮތެވެ.

މި ނޫނަސް މިދާއިރާގެ ޕްރޮގްރެސިވް ކޮންގްރެސް ކޯލިޝަންގެ ޕްރައިމަރީ ވޯޓާސް ލިސްޓުގައި ގިނަ މައްސަލަތަކެއް ހުރިކަމުގެ ތުހުމަތު ދާއިރާގެ ދެރަށުންވެސް އަންނަނީ ކުރަމުންނެވެ. އެގޮތުން ފާހަގަކުރެވޭ މައްސަލަތަކުގެ ތެރޭގައި ދުވަހަކުވެސް ޕާޓީއަކަށް ސޮއިނުކުރާ ފަރާތްތައް ލިސްޓްގައި ހިމެނުމާއި، އިލެކްޝަން ކޮމިޝަނުން ވެރިފައިކޮށް ރަޖިސްޓަރ ކޮށްފައިވާ ބައެއް ފަރާތްތައް ލިސްޓުގައި ނެތުމާއި، ކުރިން ޕީއެންސީއަށް ވަނުމަށް ފޯމުހުށަހެޅުމުން ފޯމު ފުރިހަމަނުވާތީ ރިޖެކްޓްކުރި ފަރާތްތަކެއް ވޯޓުލެވޭނެކަމަށް ފާހަގަ ކޮށް ލިސްޓަށް އިތުރުކޮށްފައިވާ މައްސަލަތަކެއް ފާހަގަވާކަމަށް ނިލަންދޫ ދާއިރާގެ ސިޔާސީ ފަރާތްތަކުން އަންނަނީ ތުހުމަތު ކުރަމުންނެވެ.

ޕްރޮގްރެސިވް ކޮންގްރެސް ކޯލިޝަނުގެ ޕްރައިމަރީ ވޯޓާސް ލިސްޓް އާންމުކުރިފަހުން، ނިލަންދޫ ދާއިރާގެ ކެމްޕެއިންވަނީ އިތުރަށް ފޯރިގަދަވެފައެވެ. ލިސްޓާއި ބެހޭގޮތުން އެކިއެކި ފަރާތްތަކުން މީސްމީޑިއާގައި ޝުޢޫރު ފާޅުކުރަމުން ގެންދަވާއިރު، ލިސްޓް އޮޅުވާލާފައިވަނީ ވަކި ކެންޑިޑޭޓަކަށް ޕްރައިމަރީ ކާމިޔާބު ކޮށްދިނުމަށް ކަމަށް ގިނަބަޔަކު ތުހުމަތު ކުރެއެވެ. އަދި އެގޮތަށް ކަންތައް ކޮށްފައިވަނީ ސައްޙަ ލިސްޓަކަށް ވޯޓުލައިފިނަމަ، އެ ކެންޑިޑޭޓް ނުހޮވޭނެކަން ޔަގީންކުރެވޭތީކަމަށްވެސް އެކިފަރާތްތަކުން ތުހުމަތު ކުރެއެވެ.

ޕްރައިމަރީ ތަކުގައި ވޯޓުލެވޭ މީހުންގެ ދަފްތަރު މިގޮތަށް “ގަޑުބަޑު” ކުރުމަކީ ގިނަ ޕާޓީތަކުން އާންމުކޮށް ކުރަމުން އަންނަ ކަމެކެވެ. އެކަން މިދާއިރާގައި މީގެކުރިން ބޭއްވުނު އެހެން އިންތިޚާބުތަކުގައިވެސް ފެނިގެން ގޮސްފައިވެއެވެ.

ޕީޕީއެމް ޕީއެންސީ ހިމެނޭ ކޮންގްރެސް ކޯލިޝަނުން ވޯޓާސް ލިސްޓް އާންމުކުރީ ޕީއެންސީގެ ވެބްސައިޓްގައި މިމަހުގެ 16 ވަނަ ދުވަހުއެވެ. އޭގެ ފަހުން އެ ވެބްސައިޓްގެ މަރާމާތަކަށް ބަންދު ކުރެވުނުއިރު، ވޯޓު ލިސްޓަށް ޝަކުވާ ހުށަހެޅުމުގެ ސުންގަޑި އޭގެ ދެ ދުވަސްފަހުން ވަނީ ހަމަވެފައެވެ.