ދިވެހި ބަހުން ލިޔެފައިވާ ދިވެހި ވާހަކަތައް ގަތުމަށް ބޭނުންވެގެން ދަނިއުސްއިން އިޢުލާނު ކޮށްފިއެވެ.

ދަނިއުސްއިން މިއަދު މީސްމީޑިއާގައި ހިއްސާކޮށްފައިވާ ކުރު އިޝްތިހާރު ޕޯސްޓެއްގައި ބުނެފައިވާ ގޮތުގައި އެފަރާތުން ސިލްސިލާ ދިގު ވާހަކަތަކުގެ އިތުރުން ކުރުވާހަކަވެސް ގަތުމަށްވަނީ ނިންމާފައެވެ.

ދަނިއުސްއިން ވާހަކަ ގަތުމަށް ނިންމާފައިވަނީ ދިވެހި ބަހަށާއި ލިޔުންތެރިކަމަށް ޝަޢުޤުވެރިވާ ފަރާތްތަކަށް ކުރިއަށް ދިއުމަށް ފުރުސަތު ހޯދައި ދިނުމުގެ ބޭނުމުގައެވެ. މިއީ ވަޒީފާތަކުގައި އުޅޭ ޒުވާނުންނަށްވެސް ލިބޭ ހުސްވަގުތުގައި ކޮންމެވެސް ވަރެއްގެ އާމްދަނީއެއް ހޯދިދާނެ ފުރުސަތެއްކަމުގައި ދަނިއުސް އިން ހާމަކުރެއެވެ.

މިފުރުސަތުގައި ދަރަނބޫދޫ ނުވަތަ ފާފު އަތޮޅުން ދަނިއުސްއަށް ވިޔަފާރި އުސޫލުން ވާހަކަ ވިއްކަން ބޭނުންވެލައްވާ ފަރާތްތަކަށް އިސްކަން ދެއްވާނެކަމަށާއި، އެހެންނަމަވެސް ޖުމުލަކޮށް ކޮންމެ ދިވެއްސަކަށްވެސް އެފުރުސަތު ހުޅުވާލެވިފައިވާކަމަށް ދަނިއުސްގެ މެނޭޖަރު އަޙްމަދު ޒުމީނު މަޢުލޫމާތު ދެއްވިއެވެ.

ޒުމީނު އިތުރަށް ވިދާޅުވީ ދަނިއުސްއަށް ވިއްކާ ވާހަކަތަކަކީ އެހެން ފަރާތެއްގެ ވާހަކައެއްގެ ކޮޕީއަކަށް ވެގެން ނުވާނެކަމަށާއި، އެވާހަކައަކީ އެހެން އެއްވެސް ފަރާތަކަށް ވިއްކާފައިވާ ވާހަކައަކަށް ވެގެން ނުވާނެކަމަށެވެ. އަދި ދަނިއުސްއިން ގަންނަ އެއްވެސް ވާހަކައެއްގެ އަސްލު ގެއްލޭގޮތަށް ދަނިއުސްއިން ބަދަލު ނުގެންނާނެކަމަށާއި، ވާހަކަ ޕަބްލިޝްކުރެވޭނީ ވާހަކަ ވިއްކާ ފަރާތަކަށް ކުރެޑިޓް ލިބޭގޮތަށް ކަމަށެވެ. ވާހަކަ ވިއްކާ ފަރާތުގެ އަމިއްލަ ނަމުގައި ޔޫސާރއެއް ހަދައިގެންވެސް ނޫހުގައި ވާހަކަ ގެނެސް ދިނުމުގެ ފުރުސަތު އެފަރާތަކަށް އެބައޮތެވެ. އެހެންނަމަވެސް، އެކަމަށް ކުޑަވަރެއްގެ ޗާޖެއް ދަނިއުސްއިން ނަގާނެއެވެ.

ދަނިއުސްއިން ގަންނަ ވާހަކަތަކަށް ތަރުޙީބު ލިބޭ މިންވަރެއްގެ މައްޗަށް ބިނާކޮށް “ބޯނަސް ޗާޖެއް” ވެސް ވާހަކަ ވިއްކާ ފަރާތަށް ދިނުމަށްވަނީ ހަމަޖެހިފައެވެ. ދަނިއުސްއަށް ވާހަކަ ފޮނުވަންވާނީ ވޯޑު ފައިލެއްގައި ލިޔެފައެވެ. އަތުން ކަރުދާހެއްގައި ލިޔެފައިވާ ވާހަކައެއްނަމަ ފޮނުވަންވާނީ ޕީޑީއެފް ފޯމެޓް ގައެވެ.

ދަނިއުސްއިން ގަންނަ ވާހަކަތަކުގެ އަގުތަށް ކަނޑައެޅުމުގައި އެކި ކަންކަމަށް ބެލޭނެކަމަށާއި އެގޮތުން އެންމެ ބޮޑަށް ބޭލެނެ ކަމަކީ ވާހަކައިގައި ހިމެނޭ ބަހުގެ ޢަދަދެވެ. ނުވަތަ ވާހަކައިގެ ދިގުމިނެވެ. އެހެން ނަމަވެސް، ވާހަކަ ލިޔުމަކީ ތަފާތު ހުނަރެއްކަމަށާއި، ދަނިއުސްގެ މަޤްސަދަކީ ލިޔުންތެރިކަމުގެ ހުނަރު ކުރިއަރުވަން ފުރުސަތެއް ހޯދައި ދިނުންކަމުގައިވެފައި، ވިއްކާ ވާހަކައަށް އަގެއް ކަނޑައެޅުމުގައި ދެފަރާތުން އަގަކަށް އެއްބަސްވުން އެއީ އިންސާފުވެރި ގޮތްކަމުގައި ދަނިއުސްއިން ދެކެއެވެ.

ދަނިއުސްއަށް ވާހަކަ ވިއްކުމަށް ޝައުޤުވެރިވާ ފަރާތްތަކުން ދަނިއުސްގެ މީސްމީޑިއާ އެކައުންޓަކަށް (ފޭސްބުކް، އިންސްޓަގްރާމް، ޓިކްޓޮކް އަދި އެކްސް) މެސެޖް ކޮށްލުމުން އިތުރު މަޢުލޫމާތު ލިބިލައްވާނެއެވެ.