މަޤާމާއި ނުފޫޒުގެ ބޭނުމުގައި ކުރާކަމެއް ގޮތަށް ޕާޓީ ބަދަލުކުރުމަކީ “ސިޔާސީ ހަށިވިއްކުން” ކަމަށް ސިފަކޮށް އިނދިކޮޅު ފަރާތްތަކަށް ވަރަށް ބޮޑަށް ފާޑުކިޔަމުން އައި ދަރަނބޫދޫ ޑިމޮކްރަޓްސްގެ އެކްޓިވިސްޓް މުޙައްމަދު އުމަރު ރާގު ބަދަލު ކޮށްފިއެވެ.
ދަރަނބޫދޫ ކައުންސިލްގެ ބައި-އިލެކްޝަންގައި ޕީއެންސީ ޓިކެޓްގައި ވާދަކުރި ކެންޑިޑޭޓް ލުޤުމާނު ޢަލީއަށް އިންތިޚާބަކާއި ނުލައި ގޮނޑި ކަށަވަރު ކުރެވުމުން، މުޙައްމަދު އުމަރުގެ އަމިއްލަ ހިއްސާ އޮންނަ ފޭސްބުކް ޕޭޖެއްގައި ލުގުމާނަށް މަރުހަބާ ކިޔައި ކޮށްފައިވާ ޕޯސްޓެއްގައި މީހަކު ވަނީ ޕީއެންސީއަށް ބަދަލުވުމަކީ ވަޒީފާޔާ އާރާއި ބާރު ހޯދުމަށް ބަދަލުވި ބަދަލުވުމެއް ނޫންތޯ ސުވާލުކޮށް މުޙައްމަދަށް ޓެގް ކޮށްފައެވެ.
އެކަމަށް ދިން ރައްދުގައި މުޙައްމަދު ބުނެފައިވަނީ “ދުވަސް ވާވަރަކަށް އެހެން މީހުންވެސް ކަންކަން ދެނެގަންނާނެ ނޫންތޯ” ސުވާލުކޮށް ކުރިން ދައްކަމުން އައި ވާހަކަ ކެންސަލް ކުރިކަމުގެ އިޝާރާތެއް ދީފައެވެ.
މީސްމީޑިއާގެ ވަސީލަތްތަކުގައި މުޙައްމަދު މީގެކުރިންވަނީ އެމްޑީޕީއާއި ޢަދާލަތުގެ ދަރަނބޫދޫ މެމްބަރުން ސިޔާސީ މަންފާ ހޯދުމަށާއި ބާރުވެރިކަން ހޯދައި ބާރުވެރިކަން ދަމަހައްޓަން މަސައްކަތްކުރާކަމަށް ބުނެ އެފަރާތްތަކަށް ވަރަށް ބޮޑަށް ފާޑުކިޔާފައެވެ. ޚާއްސަކޮށް ސަރުކާރު ބަދަލުވެ، އައު ރައީސުލް ޖުމްހޫރިއްޔާއާއި އެމަނިކުފާނުގެ އަނބިކަނބަލުންނާއެކު ޢަދާލަތު އަދި އެމްޑީޕީއަށް ނިސްބަތްވާ ދަރަނބޫދޫ ބަޔަކު ނަގާފައިވާ ފޮޓޯއަކަށް ވަރަށް ބޮޑަށް ފާޑުކިޔާފައިވެއެވެ. އަދި އެއީ އިންސާނީ ވަގުފާރިކަމަށާއި ސިޔާސީ ހަށިވިއްކާ ބައެއްކަމަށް ދޭހަވާގޮތަށް ވާހަކަ ދައްކަވާކަން ފާހަގަކުރެވުނެވެ.
އެހެންނަމަވެސް، ސިޔާސީގޮތުން މުޙައްމަދާއެކު ދަޑިމޮކްރެޓްސް އަށް ސޮއިކުރުމަށްފަހު، މާގިނަ ދުވަހެއް ނުވަނީސް މުޙައްމަދުގެ ޅިޔަނެއްކަމުގައިވާ ލުޤުމާނު ޢަލީވަނީ އެޕާޓީ ދޫކުރައްވާ ވެރިކަން ކުރާ ޕީއެންސީއަށް ސޮއިކުރައްވާފައެވެ. އެކަމަށްޓަކައި ދަރަނބޫދޫގެ ގިނަ ބަޔަކުވަނީ ލުޤުމާނަށްވެސް ފާޑުކިޔާފައިކަން ފާހަގަކުރެވެއެވެ.
މުޙައްމަދު ޢުމަރު ފާހަގަކުރެވެނީ ދަރަނބޫދޫގެ ކަންކަމަށް މީސްމީޑިއާގައި ބަސްބުނެހަދާ ވަރަށް ޙަރަކާތްތެރި އެކްޓިވިސްޓެއް ގޮތުގައެވެ. ޚާއްސަކޮށް ސިޔާސީ ކަންކަމުގައި ވަރަށް ފާޅުގައި އަދި ނުސީދާކޮށްވެސް ޚިޔާލު ފާޅުކުރާ އެކްޓިވިސްޓެއް ގޮތުގައެވެ.
