ވާދަވެރި އިންތިޚާބެއް އަދި ވާދަވެރި ކެމްޕެއިނެއް ކުރުމެއް ނެތި ދަރަނބޫދޫ ކައުންސިލްގެ ހުސްވެފައިވާ ކައުންސިލް މެމްބަރު ކަމަށް އެކައުންސިލްގެ ސްޕޯޓްސް ކައުންސިލަރ މަޤާމު އަދާކުރައްވަމުން ގެންދެވި ލުގުމާނު ޢަލީ އިންތިޚާބުވެއްޖެއެވެ.

އިލެކްޝަން ކޮމިޝަނުން ވިދާޅުވީ އަންނަ ޖަނަވަރީ މަހުގެ 27 ވަނަ ދުވަހު ބޭއްވުމަށް ހަމަޖެހިފައިވާ ދަރަނބޫދޫ ކައުންސިލްގެ ބައި-އިލެކްޝަނަށް ކުރިމަތި ލުމުގެ މުއްދަތު ހަމަވިއިރު، ކުރިމަތި ލައްވާފައިވަނީ އިންތިޚާބު ކުރަންޖެހޭ އަދަދަށް ކަމަށެވެ.

މިއަހަރުގެ ރިޔާސީ އިންތިޚާބުގެ ކުރިން “ދަ ޑިމޮކްރެޓްސް” އުފެއްދުމަށް މަސައްކަތް ކުރައްވަމުން ގެންދެވިއިރު، ލުގުމާނު ވަނީ އެޕާޓީއަށް ސޮއިކޮށްފައެވެ. އެހެންނަމަވެސް، ރިޔާސީ އިންތިޚާބުގެ ދެވަނަ ބުރުގައި މިހާރުގެ ރައީސް ޑރ. މުއިއްޒުއަށް ވަރަށް ފާޅުކަން ބޮޑުގޮތެއްގައި ކެމްޕެއިން ކުރެއްވިއެވެ. ދަރަނބޫދޫ ކައުންސިލް މެމްބަރުކަމަށް ލުގުމާނު ކުރިމަތިލައި އިންތިޚާބު ވެފައިވަނީ ވެރިކަން ކުރާ ޕާޓީ ޕީއެންސީގެ ޓިކެޓްގައެވެ.

ލޯކަލް ކައުންސިލްތައް އުފެދުނު ފަހުން މިހާތަނަށް ބޭއްވުނު ހުރިހައި ކައުންސިލް އިންތިޚާބެއްވެސް ދަރަނބޫދޫގައި ކުރިއަށް ގޮސްފައިވަނީ ވަރަށް ފޯރިގަދަ ކޮށެވެ. އެހެން ނަމަވެސް، މިފަހަރުގެ އިންތިޚާބާއި ދިމާކޮށް އެފޯރިއެއް ރަށުތެރެއަކުން ނުފެނެއެވެ. މިއީ ކައުންސިލްތައް އުފެދުނު ފަހުން ދަރަނބޫދޫގައި ބޭއްވުނު ފުރަތަމަ ބައި-އެލެކްޝަނެވެ. އެންމެ ފުރަތަމަ އިންތިޚާބު ކުރެވުނު ކައުންސިލްގެ ދައުރުގެ ފަހުކޮޅުގައި އެކައުންސިލްގައި ހިމެނުނު އަދާލަތު ޕާޓީގެ ކައުންސިލް މެމްބަރު އަޙްމަދު ޒުމީނު އިސްތިއުފާ ދެއްވިނަމަވެސް، ބައި-އިލެކްޝަން ބޭއްވުމަށް ޤާނޫނުގައި ބުނެފައިވާ މުއްދަތު ނެތުމުން އެއިންތިޚާބު ބާއްވާފައި ނުވެއެވެ.

ދަރަނބޫދޫ ކައުންސިލްގެ ބައި-އެލެކްޝަނެއް މިފަހަރު ބާއްވަން ޖެހިފައިވަނީ މިއަހަރުގެ ނޮވެމްބަރު މަހު އެކައުންސިލްގެ މެމްބަރުކަމުން އާދަމް ޙަލީމް އިސްތިއުފާ ދެއްވުމާއި ގުޅިގެންނެވެ. ދަރަނބޫދޫ ކައުންސިލަރުންގެ ހައިސިއްޔަތު މިހާރު ބެހިފައިވާ ގޮތަށް ބަލާއިރު އެކައުންސިލްގައި މިހާރު ތިއްބަވަނީ ޢަދާލަތު ޕާޓީގެ ދެ މެމްބަރުންނާއި އެމްޑީޕީގެ މެމްބަރަކާއި ޕީޕީއެމްގެ މެމްބަރެއްގެ އިތުރުން މިއަދު އިންތިޚާބުވި ޕީއެންސީގެ މެމްބަރެވެ. ދަނިއުސްއަށް މަޢުލޫމާތު ލިބިފައިވާ ގޮތުގައި ޕީޕީއެމް މެމްބަރު ވަރަށް އަވަހަށް ޕީއެންސީއާއި ގުޅިވަޑައިގަތުމަށްވަނީ ނިންމާފައެވެ.