88 ދަރިވަރުންނާއެކު ފ.އަތޮޅު ޤުރުއާން މުބާރާތް ފަށައިފި

88 ދަރިވަރުންނާއެކު ފ.އަތޮޅު ޤުރުއާން މުބާރާތް ފަށައިފި

Alimohamed

88 ދަރިވަރުންނާއެކު ފ.އަތޮޅު ޤުރުއާން މުބާރާތް ފަށައިފި

ލިޔުން ކިޔާލެވޭނީ ގާތްގަޑަކަށް 2 މިނިޓުން

ފ. އަތޮޅު ކައުންސިލުން އަތޮޅުގެ ރަށްތަކަށް ހުޅުވާލައިގެން ކުރިއަށް ގެންދާ ފ.އަތޮޅު ޤުރުއާން މުބާރާތް 2023 މިރޭ ފަށައިފިއެވެ. ފ. އަތޮޅުގެ ހުރިހާ ރަށެއްގެ ސްކޫލުތަކުގެ ދަރިވަރުން ވާދަކުރާ މިމުބާރާތުގެ ކިޔެވުން ކުރިއަށް ގެންދިއުމަށް ހަމަޖެހިފައިވަނީ ހުކުރު ދުވަހުގެ ރޭގެ ނިޔަލަށެވެ.

އެކި ކީ ސްޓޭޖްތަކަށް ބަހާލައިގެން ދަރިވަރުން ވާދަކުރަމުން އަންނަ މިމުބާރާތުގައި މިރޭ ޖުމުލަ 14 ދަރިވަރަކު ވަނީ ކިޔަވާފައެވެ. މިރޭ ކުރިއަށް ގެންގޮސްފައިވަނީ ބަލައިގެން ކިޔެވުމުގެ ގޮފިން ކީ ސްޓޭޖް 5 އަދި 4 ގެ ދަރިވަރުންގެ ކިޔެވުމެވެ. ހުކުރު ދުވަހުގެ ހެނދުނުގެ ދަންފަޅީގައި ކީ ސްޓޭޖް 3، ފައުންޑޭޝަން އަދި ކީ ސްޓޭޖް 1 ގެ ބަލައިގެން ކިޔަވާ ދަރިވަރުންގެ ކިޔެވުން އޮންނާނެއެވެ. ހުކުރު ދުވަހުގެ މެންދުރު ފަހު ކީ ސްޓޭޖް 2 ގެ ބަލައިގެން ކިޔެވުން ކުރިއަށް ގެންދިއުމަށް ނިންމާފައިވާއިރު، ނުބަލައި ކިޔަވާ ދަރިވަރުންގެ ހުރިހާ ކީ ސްޓޭޖެއްގެ ކިޔެވުން އޮންނާނީ އަޞުރު ނަމާދަށްފަހު އަދި މާދަމާ ރޭގައެވެ.

މި މުބާރާތް ކުރިއަށް ގެންދިއުމަށް ފ.އަތޮޅު ކައުންސިލުން ޙަވާލު ކުރައްވާފައިވަނީ ފ. މަގޫދޫ ސްކޫލާއެވެ. މުބާރާތް މަގޫދޫގައި ކުރިއަށް ދާއިރު، މަގޫދޫ ސްކޫލާއި މަގޫދޫ ކައުންސިލް އަދި ރަށުގެ އެހެން މުވައްސަސާތަކުން ގުޅިގެން ވަރަށް ފުރިހަމައަށް މުބާރާތަށް ތައްޔާރުވެފައިވާކަން ފާހަގަކުރެވެއެވެ.  މިމުބާރާތް ކުރިއަށް ގެންދާ މަގޫދޫ އިޖްތިމާޢީ މަރުކަޒުގެ މަރާމާތުކޮށް ތަން ޒީނަތްތެރި ކުރުމަށް މަގޫދޫ ފެނަކަ ޓީމުން ކޮށްފައިވާ ބުރަ މަސައްކަތް މަގޫދޫ ކައުންސިލުންވެސް މީސް މީޑިއާގައި ފާހަގަކުރައްވާފައިވެއެވެ.

މުބާރާތް ފެއްޓެވުމުގެ ގޮތުން ފ.އަތޮޅު ކައުންސިލްގެ ރައީސް ޢަލީ މުޙައްމަދު ދެއްކެވި ވާހަކަފުޅުގައިވެސް މަގޫދޫއިން މުބާރާތަށް ވެފައިވާ ތައްޔާރީތަކަށް ޝުކުރު އަދާކުރެއްވިއެވެ. ރައީސްގެ ވާހަކަފުޅުގައި މިމުބާރާތުގައި ވާދަކުރައްވާ ދަރިވަރުންގެ ތެރެއިން ހޮވާލެވޭ ދަރިވަރުންނަށް ރާއްޖޭގެ 36 ވަނަ ޤައުމީ ޤުރުއާން މުބާރާތުގައި ވާދަކުރުމުގެ ފުރުޞަތު ލިބިގެންދާނެއެވެ. މިދިޔަ އަހަރުގެ މިމުބާރާތުގައި ވާދަކުރި ދަރިވަރުންނަށްވުރެ މިއަހަރު ވާދަކުރާ ދަރިވަރުންގެ އަދަދު އިތުރުވެފައިވާތީ ހުނަރުވެރި ދަރިވަރުންތަކެއް ފެނިގެން ދިއުމަށް އުއްމީދު ކުރައްވާކަމަށް ރައީސް ވިދާޅުވިއެވެ.

fandiyaaru
ފަނޑިޔާރުންގެ ފަރާތުން ބައިވެރިންނާ މުޚާތަބުކުރުން

މިއަހަރުގެ މުބާރާތުގެ ފެންވަރު ރަނގަޅުކުރުމަށް އަތޮޅު ކައުންސިލުންވެސް ބުރަކޮށް މަސައްކަތް ކުރެއްވިކަން ފާހަގަކުރައްވަމުން އެކައުންސިލްގެ ރައީސް ވިދާޅުވީ، މުބާރާތް ކުރިއަށް ގެންދިއުމަށް އިސްލާމިކް މިނިސްޓްރީއާއި މަޝްވަރާކުރެވިގެން ރަނގަޅު ފެންވަރުގެ ފަނޑިޔާރުން ގެނެވިފައިވާތީ، އެބޭފުޅުންގެ ފަރާތުން ދަރިވަރުންނަށް އިތުރު ކަންކަން ދަސްވުމަށް ފުރުޞަތު ފަހިވެގެން ގޮސްފައިވާކަމަށެވެ.

މި މުބާރާތުގެ ފަނޑިޔާރުންގެ ގޮތުގައި މަސައްކަތް ކުރައްވަނީ އައްޝެއިޚް މުޙައްމަދު މައުމޫނާއި އައްޝެއިޚް ޙަސަން ތަޢުފީޤުގެ އިތުރުން އަލްޤާރީ ޙުސައިން ޝަފީޤެވެ. މުބާރާތުގެ ކިޔެވުން ފެށުމުގެ ކުރިން ފަނޑިޔާރުންގެ ފަރާތުން މުބާރާތުގެ ބައިވެރިންނާއި ބެލެނިވެރިންނާ މުޚާތަބުކޮށް މުބާރާތުގައި ބަލާނެކަންކަމާއި ސަމާލުކަން ދޭންވީ މުހިންމު ކަންކަން ހަނދާން ކޮށްދެއްވިއެވެ.

ފ.އަތޮޅު ޤުރުއާން މުބާރާތުގެ ކިޔެވުން ދަނިއުސް މީޑިއާއިން ލައިވްކުރާނެއެވެ. މިމުބާރާތުގެ މީޑިއާ ކަވަރޭޖް ގެނެސް ދިނުމަށް ދަނިއުސްއަށް ސްޕޮންސާރގެ ގޮތުގައި އެހީތެރިކަން ވެދެއްވާފައިވަނީ ފ.އަތޮޅުގައި ކަނޑު ދަތުރުފަތުރުގެ ޚިދުމަތްތައް ފުޅާ ދާއިރާއެއްގައި ދެއްވަމުން ގެންދަވާ ވިޔަފާރިވެރިންގެ ތެރޭގައި ހިމެނޭ ދ.މީދޫ ޑީއެމްއެމްއޭ އެކްސްޕްރެސް، ފ. ނިލަންދޫ ކާމިޔާބު-7 އަދި ފ. ބިލެތްދޫ އެންދެރި ބޯޓުގެ އިތުރުން ފ.އަތޮޅު ކައުންސިލުންނެވެ.

ޙިއްސާ ކުރައްވާ:

ގުޅުންހުރި