މިހާރު މާލޭގައި ކުރިއަށްދާ އިންޓަރ ސްކޫލް ވޮލީބޯޅަ މުބާރާތުގައި ފ އަތޮޅު މަދަރުސާގެ 4 ޓީމްގެ ތެރެއިން 3 ޓީމުން ފައިނަލުގެ ޖާގަ ކަށަވަރުކޮށްފިއެވެ. އަތޮޅު މަދަރުސާ މިފަހަރުގެ މުބާރާތަށްވެސް ގޮސްފައިވަނީ މުބާރާތުގައި ކުޅޭ 2 އުމުރުފުރާ ކަމުގައިވާ 14 އަހަރުން ދަށާއި 16 އަހަރުން ދަށުން، ކޮންމެ އުމުރުފުރާ އަކުން ދެޖިންސްގެ 2 ޓީމް ގޮވައިގެންނެވެ.
މުބާރާތުގެ 14 އަހަރުން ދަށުގެ އަންހެން ކުދިންގެ ބައިން އަތޮޅު މަދަރުސާ ފައިނަލަށް ދިޔައީ ސެމީ ފައިނަލުގައި ތާޖުއްދީން ސްކޫލް ސީދާ 3 ސެޓުން ބަލިކޮށްގެންނެވެ. ސެމީ ފައިނަލް މެޗްގެ މޮޅުކުޅުންތެރިއަކަށް ހޮވުނީ ފ އަތޮޅު މަދަރުސާ ޓީމްގެ އައިޝަތު އީވާ އަބްދުއްﷲ އެވެ. ފައިނަލްގައި އެޓީމް ބައްދަލުކުރާނީ މަޑިފުށީ ސްކޫލާއެވެ.
16 އަހަރުން ދަށުގެ އަންހެން ޓީމް ފައިނަލަށް ދިޔައީ ކެޔޮދޫ ސްކޫލާއިއެކު ކުޅުނު ސެމީ ފައިނަލް މެޗް ސީދާ 3 ސެޓުން ކާމިޔާބުކޮށްގެންނެވެ. އެ މެޗްގެ މޮޅު ކުޅުންތެރިއަކަށް ހޮވުނީ ފ އަތޮޅު މަދަރުސާގެ އީމާން ޢަލީ އެވެ. އެޓީމް ފައިނަލްގައި ބައްދަލުކުރާނީ ކުނބުރުދޫ ސްކޫލްގެ ޓީމާއެވެ.
ފ އަތޮޅު މަދަތުސާގެ 14 އަހަރުން ދަށުގެ ފިރިހެން ވޮލީ ޓީމް ފައިނަލަށް ދިޔައީ، 4 ޓީމް ބައިވެރިވި އުމުރުފުރާގެ ލީގް ބުރުގައި ކުޅުނު ހުރިހާ މެޗެއް ކާމިޔާބުކޮށްގެން ޓޭބަލްގެ 1 ވަނަ ޓީމްގެ ގޮތުގައެވެ. މި ކެޓަގަރީގެ ފައިނަލްގެ ޖާގަ ހޯދާފައިވާ އަނެއް ޓީމަކީ ކެޔޮދޫ ސްކޫލްއެވެ.
ފ އަތޮޅު މަދަރުސާގެ ވޮލީ ޓީމްތަކުގެ ތެރެއިން ފައިނަލަށް ނުދަނީ 16 އަހަރުންދަށުގެ ފިރިހެން ޓީމެވެ. އެޓީމަށް ފައިނަލުގެ ޖާގަގެއްލި، މުބަރާތުގެ 3 ވަނައަށް ވާދަކުރުމަށް 3 ވަނަ ހޮވާ މެޗްގައި ކުޅެން ޖެހުނީ ސެމީ ފައިނަލުގައި އ،ދ އަތޮޅު މަދަރުސާ އަތުން ބަލިވުމުންނެވެ. ތިންވަނަ ހޮވާ މެޗްގައި މިއަދު އެޓީމް ވާދަކުރާނީ ކެޔޮދޫ ސްކޫލުގެ ޓީމާއެވެ. މި ބައިގެ ފައިނަލަށް ގޮސްފައިވަނީ ކުނބުރުދޫ ސްކޫލާއި އ،ދ އަތޮޅު މަދަރުސާގެ ޓީމެވެ.
ފ އަތޮޅު މަދަރުސާއަކީ އެންމެ ފަހުންބޭއްވި އިންޓަރ ސްކޫލް ވޮލީ މުބާރާތުގެވެސް އެންމެ ކާމިޔާބުޓީމެވެ. އެ މަދަރުސާއިން ވަނީ އެފަހަރު 14 އަހަރުން ދަށުގެ ދެ ޑިވިޜަންގެ ޗެމްޕިއަނުންގެ އިތުރުން 16 އަހަރުން ދަށުގެ ފިރިހެން ކުދިންގެ ޗެޕްޕިއަންކަން ވެސް ހޯދާފައެވެ. އަދި 16 އަހަރުންދަށުގެ އަންހެން ކުދިންގެ ރަނަރއަޕް ކަންވެސް ހޯދާފައިވަނީ އެމަދަރުސާއެވެ. ފައިނަލަށް ޓީމްތައް ހޮވިފައިވާ ގޮތަށް ބަލާއިރު މިފަހަރުވެސް އެންމެގިނަ ތަށި ހޯދުމުގެ ފުރުސަތުއޮތް ޓީމަކީ ފ އަތޮޅު މަދަރުސާއެވެ.
