މި އޮކްޓޫބަރު މަހު ބޭއްވުނު ފ އަތޮޅު އިންޓަރ ސްކޫލް ކުޅިވަރު މުބާރާތްތަކުގެ އެންމެ ކާމިޔާ ސްކޫލް، ފ އަތޮޅުމަދަރުސާ އިންޓަރ ސްކޫލް ވޮލީ މުބާރާތުގައި ވާދަކުރުމަށް ތައްޔާރުވެއްޖެއެވެ. ފ. އަތޮޅުގައި މުޅިން އަލަށް އިންޓަރ ސްކޫލް ކުޅިވަރު މުބާރާތްތައް ތަޢާރަފްކުރެވުނުއިރު ފީއަލީ ފ އަތޮޅު މަދަރުސާ އަކީ މިއިވެންޓްގައި ބޭއްވުނު 2 މުބާރާތުގެ ތެރެއިން އަންހެންކުދިންގެ ހޭންޑްބޯޅަ ޗެންޕިއަން، އަދި ފިރިހެންކުދިންގެ ފުޓްސަލްގެ ރަނަރއަޕް ޓީމެވެ.

19 ސްކޫލަކުން 42 ޓީމް ބައިވެރިވެފައިވާ އިންޓަރ ސްކޫލް ވޮލީމުބާރާތަށް ފ އަތޮޅުމަދަރުސާ ދިއައީ 4 ޓީމް ގޮވައިގެންނެވެ. އެއީ 16 އަހަރުން ދަށާއި 14 އަހަރުންދަށުން ކޮންމެ އުމުރުފުރާއަކުން އަންހެންޓީމަކާއި ފިރިހެންޓީމެކެވެ. މި ޓީމްތަކުގެ ކޯޗަކީ ފ އަތޮޅުގެ އެންމެ ފާހަގަކޮށްލެވޭ އެއް ކުޅިވަރު ސަޙްސިއްޔަތު ފީއަލީ ޢަލީ ޒާހިރެވެ. އެސިސްޓަންޓް ކޯޗަކީ މުޙައްމަދު ފަޒީންއެވެ.

އިންޓަރ ސްކޫލް ވޮލީ ބޯޅަ މުބާރާތް ހަތަރު އަހަރުގެ މެދުކެނޑުމަކަށްފަހު ފަށާއިރު ފ އަތޮޅު މަދަރުސާއަކީ އެންމެ ފަހުންބޭއްވި މުބާރާތުގެވެސް އެންމެ ކާމިޔާބުޓީމެވެ. އެ މަދަރުސާއިން ވަނީ އެފަހަރު 14 އަހަރުން ދަށުގެ ދެ ޑިވިޜަންގެ ޗެމްޕިއަނުންގެ އިތުރުން 16 އަހަރުން ދަށުގެ ފިރިހެން ކުދިންގެ ޗެޕްޕިއަންކަން ވެސް ހޯދާފައެވެ. އަދި 16 އަހަރުންދަށުގެ އަންހެން ކުދިންގެ ރަނަރއަޕް ކަންވެސް ހޯދާފައިވަނީ އެމަދަރުސާއެވެ.

ގޮންޖެހުންތަކެއްހުރި ނަމަވެސް ބެލެނިވެރިންގެ ވަރަށްބޮޑު އެއްބާރުލުމަކާއި، މާލީ އެހީތެރިކަމާއެކު 4 ޓީމު ތައްޔާރުކޮށްގެން ދިޔަ އަތޮޅުމަދަރުސާ މިއަދު މުބާރާތުގެ ފުރަތަމަ މެޗްތައް ކުޅޭނެއެވެ. 4 ޓީމްގައި ޖުމުލަ 50 ދަރިވަރުން ޕްރެކްޓިސް ކުރިއިރު ކުޅޭނޭ އެކަށީގެންވާ ފެންވަރުގެ ކޯޓެއް ނެތުމާއި، ވޮލީ ބޯޅަފަދަ ވަސީލަތްތަކުގެ ދަތިކަންވެސް ކުރިމަތިވި ކަމަށް ޓީމުން މަޢުލޫމާތުދެއްވައެވެ. އަދި މި މުބާރާތާއި މާ ކައިރިކޮށް އަތޮޅު އިންޓަރ ސްކޫލް ފުޓްސަލް އާއި ހެންޑްބޯޅަ މުބާރާތް އޮތުމުންވެސް ޕްރެކްޓިސްކުރުމުގައި އުނދަގޫތަކެއް ކުރިމަތިވިއެވެ.

ޓީމާއިއެކު މާލޭގައި ހުންނަވައިގެން ދަނިއުސްއަށް މަޢުލޫމާތު ދެއްވަމުން އެސިސްޓަންޓް ކޯޗް ފަޒީން ފާހަގަކުރެއްވި ގޮތުގައި ފ އަތޮޅުމަދަރުސާގެ އުންމީދަކީ “މިފަހަރުވެސް 4 ތައްޓެވެ”.