އެސޯސިއޭޝަން ފޮރ ވެސްޓް ޔުނައިޓެޑް (އޭޑަބަލިއުޔޫ) ގެ ތިންވަނަ ދައުރުގެ ހިންގާ ކޮމެޓީގެ މެމްބަރުން އިންތިޚާބު ކޮށްފިއެވެ. މެމްބަރުން އިންތިޚާބު ކުރުމަށް ވޯޓުލުން ކުރިއަށް ގެންގޮސްފައިވަނީ އިއްޔެގައެވެ.
އެ ޖަމްޢިއްޔާގެ ހިންގާކޮމެޓީ އެކުލެވިގެންވަނީ 10 މެމްބަރުންގެ މައްޗަށެވެ. ތިންވަނަ ދައުރުގެ ރައީސަކަށް އިންތިޚާބު ކުރެވުނީ މަޙްމޫދު އަޙްމަދު (ދޮންބެ) އެވެ. ނައިބް ރައީސަކަށް އިންތިޚާބު ކުރެވުނީ މުޙައްމަދު ނަސީމެވެ. މި މަޤާމްތަކަށް ކުރިމަތި ލައްވާފައިވަނީވެސް މި ދެބޭފުޅުން އެކަންޏެވެ.
ރައީސް އަދި ނައިބް ރައީސްގެ އިތުރުން އިތުރު 8 މެމްބަރަކު ހިންގާ ކޮމެޓީއަށް އިންތިޚާބު ކުރެވެއެވެ. އެހެން ނަމަވެސް އެ ޖަމްޢިއްޔާގެ ހިންގާ ކޮމެޓީގެ އިތުރު މެމްބަރަކަށް ވުމަށްއެދި 9 ފަރާތަކުން ކުރިމަތިލިއެވެ. މެމްބަރުންގެ ތެރެއިން މެމްބަރުކަމަށް އިންތިޚާބު ވެފައި ނުވަނީ ނިޝާނާ ޢަބްދުﷲ އެވެ.
މި ނަތީޖާއާއެކު އިންތިޚާބު ކުރެވުނު 8 މެމްބަރުންނަށްވަނީ ޖަމްޢިއްޔާގެ އެކިއެކި މަސްޢޫލިއްޔަތުތައް ޙަވާލުކުރެވިފައެވެ. އެގޮތުން ޚަޒާންދާރުގެ މަސްޢޫލިއްޔަތު ފާތިމަތު ޒަހިއްޔާ، ސެކްރެޓަރީގެ މަސްޢޫލިއްޔަތު ސަބީނާ ޢުމަރަށް އަދި އެސިސްޓެންޓް ސެކްރެޓަރީގެ މަސްޢޫލިއްޔަތު އާމިނަތު ޢަބްދުއްލަޠީފާއި ވަނީ ޙަވާލުކުރެވިފައެވެ.
އޭޑަބްލިއުޔޫ އަކީ ދަރަނބޫދޫގައި އިޖްތިމާޢީ މަސައްކަތްތަކުގައި އިސްނަގައި ހަރަކާތްތެރިވާ ޖަމްޢިއްޔާއެކެވެ. ފާއިތުވީ އަހަރު މިޖަމްޢިއްޔާއިން ކޮށްފައިވާ މުހިންމު މަސައްކަތްތަކުގެ ތެރޭގައި، އައުޓްޑޯ ޖިމް ސަރަޙައްދު ސާފުކުރުމާއި، ދަރަނބޫދޫ ސްކޫލުގެ 2021 ވަނަ އަހަރުގެ އެންމެ މޮޅު އަންހެން އަދި ފިރިހެން އެތުލީޓަށް ދޭ ޓްރޮފީ ސްކޫލަށް ހަދިޔާކުރުމާއި، ރަށުގެ ބަނދަރުމަތީ ޖޯލިފަތިތަކުގެ ދާތަށް ބަދަލުކުރުމާއި އަލިބެ މައިޒާނުގައި ޑަސްޓްބިން ބެހެއްޓުމުގެ އިތުރުން މަސްޖިދުލް ކިފާޙް މިސްކިތުގެ މަގުފާރުގައި ކުލަލުން ހިމެނެއެވެ.
މި ދައުރުގައި ރައީސަކަށް ހޮވުނު މަޙްމޫދު އަޙްމަދު ވިދާޅުވި ގޮތުގައި ޖަމްޢިއްޔާއިން މިދައުރުގައި ގެންގުޅޭނެ ތަސައްވުރަކީ، އިޖްތިމާޢީ އަދި އާއިލީ ގުޅުންތައް ބަދަހިކޮށް، ދީނީގޮތުން މީހުން ހޭލުންތެރިކޮށް އިހުގައި އޮތް ރީތި ސަޤާފަތާއި އާދަކާދަ އަދި ކުޅިވަރުތައްވެސް ދިރުވައި އާލާކުރުމަށް މަސައްކަތްކުރުން ކަމަށެވެ.
އޭޑަބްލިއުޔޫއަކީ 2019 ވަނަ އަހަރުގެ މާޗް 10 ވަނަ ދުވަހު ރަޖިސްޓްރީ ކުރެވިފައިވާ ޖަމްޢިއްޔާއެކެވެ. މި ޖަމްޢިއްޔާގެ މުއައްސިސުންނަކީ އަޙްމަދު އާމިރާއި، ޢަބްދުލް ވާޙިދު ސުލައިމާނުގެ އިތުރުން މުޙައްމަދު އަޙްމަދެވެ.
