ދަރަނބޫދޫ ކައުންސިލުން އެސޯސިއޭޝަން ފޮރ ދަރަނބޫދޫ ޑިވެލޮޕްމަންޓް (އެޑް ޖަމްޢިއްޔާގެ) ޚިދުމަތުގެ އަގުވަޒަންކޮށް، ހަނދާނީ ލިޔުމެއް ދެއްވައިފިއެވެ.
ދަރަނބޫދޫ ކައުންސިލަށް 64 އަހަރު ފުރުން ފާހަގަކުރުމަށް ހޮނިހިރު ދުވަހުގެ ރޭ ބޭއްވި ޚާއްސަ ރަސްމިއްޔާތުގައި އެޑް ޖަމިއްޔާގެ ފަރާތުން މި ހަނދާނީ ލިޔުމާއި ޙަވާލުވެލައްވާފައިވަނީ ޖަމިއްޔާގެ ރައީސާ ފަޟްލާ މުޙައްމަދެވެ.
ދަރަނބޫދޫ ކައުންސިލްގެ އެކިއެކި ބޭނުންތަކަށް ރަށުން ބޭރުން ވަޑައިގަންނަވާ ފަރާތްތަކަށް އެޑް ޖަމްޢިއްޔާއިން ހިލޭ އެކޮމަޑޭޝަން ހަމަޖައްސަވައި ދެއްވާކަން ކައުންސިލުން އުފަލާއެކު ބަލައިގަންނަ ކަމަށާއި، އެ ޖަމްޢިއްޔާއިން އޭސީ އާއި އެހެނިހެން ތަކެތީގެ އެހީތެރިކަން ކައުންސިލަށް ފޯރުކޮށް ދެއްވާފައިވާކަމަށް، މި ރަސްމިއްޔާތުގައި ފާހަގަކުރައްވާފައިވެއެވެ. މީގެ އިތުރުން ރަށުގެ “އުސްފަހު ޕާކް” މަރާމާތުކުރުމަށް ބޭނުންވާ ގިނަ ތަކެތި ކައުންސިލަށް ފޯރުކޮށް ދިނުމާއި، ރަށުގެ އަވަށް ބޭރު މަގުތައް ހިލޭ ސާބަހަށް އެޑް ޖަމްޢިއްޔާއިން ސާފުކުރައްވަމުން ގެންދަވާކަން ފާހަގަކުރައްވާފައިވެއެވެ.
ދަރަނބޫދޫ ކައުންސިލް އިދާރާއަށް އެކިއެކި ކަންކަމުގައި އެހީތެރިކަމާއި އެއްބާރުލުން ފޯރުކޮށް ދެއްވާފައިވާތީ އެކަމުގެ އަގުވަޒަންކޮށް އެޑް ޖަމްޢިއްޔާއަށް ހަނދާނީ ލިޔުން ދެއްވާފައިވާއިރު، މިއީ މި ރަސްމިއްޔާތުގައި ހަނދާނީ ލިޔުން ހާސިލްކުރި ހަމައެކަނި ޖަމްޢިއްޔާކަން ފާހަގަކުރެވެއެވެ.
އެޑް ޖަމްޢިއްޔާގެ ޚިދުމަތުގެ އަގުވަޒަން ކުރައްވާފައިވާތީ، އެކަމަށްޓަކައި ދަރަނބޫދޫ ކައުންސިލަށް ޝުކުރު ދަންނަވާކަމަށް އެޖަމްޢިއްޔާއިން ފޭސްބުކް މަންސައިގައި ހާމަކުރައްވާފައިވެއެވެ.
އެޑް ޖަމްޢިއްޔާ ހިމެނިފައިވަނީ ރަށު ފެންވަރުގައި ފާހަގަކޮށްލެވޭ ކާމިޔާބު މަސައްކަތްތަކެއް ކުރެވިފައިވާ ޚިދުމަތްތެރި ޖަމްޢިއްޔާއެއްގެ ގޮތުގައެވެ.
