ކުނބުރުދޫ ކުނިގޮނޑުން ކުރިނބީއަށް މެހީގެ އުދަނގޫ؛ ބޮޑު ބަލިމަޑުކަމެއްގެ ބިރު!

އިޝްތިހާރު

ހދ. ކުރިނބީގައި މި ދުވަސްވަރު އާދަޔާޚިލާފަށް މެހި ގިނަވެ، ރަށުގެ ރައްޔިތުންގެ އާންމު ދިރިއުޅުމަށާއި ސިއްޚަތަށް ބޮޑެތި ނުރައްކާތަކަކާ ކުރިމަތިލާން ޖެހިދާނެ ކަމުގެ ބިރު ވަރަށް ބޮޑަށް ހީވެއްޖެއެވެ.

ކުރިނބީގައި މިގޮތަށް މެހި ޢާލާވެ ގިނަވާން މެދުވެރިވި މައިގަނޑު ސަބަބަކީ އެ ރަށާ ދާދި ކައިރީގައި އޮންނަ ހދ. ކުނބުރުދުއަށް ވެމްކޯއިން ކުނި އަޅަން ފަށާފައިވުމެވެ. އެ ރަށުގައި އެކަށީގެންވާ ރައްކާތެރި ފިޔަވަޅުތަކެއް އެޅުމެއް ނެތި ކުނި ޖަމާކުރަމުންދާތީ، މެހި ޢާލާވުމަށް ފަހި މާޙައުލެއް އުފެދި، އޭގެ ނޭދެވޭ އަސަރު ވަށައިގެންވާ ރަށްރަށަށް ކުރަމުންދާ ކަމަށް ރަށުން މަޢުލޫމާތުދެއެވެ.

އިޝްތިހާރު

ރަށުގެ ބައެއް ރައްޔިތުން ފާހަގަކުރި ގޮތުގައި، މިކަމަށް އަވަސް ހައްލެއް ނުގެނެވިއްޖެނަމަ، އާންމު ސިއްޚަތަށް ނުރައްކާވާ ފަދަ ގައިންގަޔަށް އަރާ ނުރައްކާތެރި ބަލިމަޑުކަމެއް ރަށުތެރޭގައި ފެތުރިގެން ދިއުމަކީ ވަރަށް ގާތް ކަމެކެވެ.

އަދި ކުނބުރުދުއަށް މިގޮތަށް ރައްކާތެރިކަމެއް ނެތް ގޮތުގައި ކުނި އެޅުމުގެ ސަބަބުން މިހާރު ދިމާވާ އުނދަގޫތަކުގެ އިތުރުން، ދުރު މުސްތަޤުބަލުގައިވެސް އިއާދަނުކުރެވޭ ފަދަ ސިއްޚީ ބޮޑެތި މައްސަލަތަކެއް ރައްޔިތުންނަށް ކުރިމަތިވުން އެކަށީގެންވެއެވެ.

މެހީގެ އުނދަގުލުގެ އިތުރުން، ހދ. ކުނބުރުދުއަކީ އެ އަތޮޅުގެ މެދުތެރޭގައި އޮންނަ ރަށަކަށް ވުމާއެކު، އެ ރަށުގައި ޖަމާކުރާ ކުނި އެންދުމުގެ ސަބަބުން އަރާ ވިހަ ދުމުގެ އަސަރު ކުރިނބީގެ އިތުރުން ވަށައިގެންވާ އެހެން ރަށްރަށުގެ ވައިގެ ތަޣައްޔަރުކަމަށް ބޮޑެތި ނޭދެވޭ އަސަރުތަކެއް ކުރާނެ ކަމުގެ ކަންބޮޑުވުންވެސް ވަނީ އިތުރުވެފައެވެ.

ރައްޔިތުންގެ ސިއްޚީ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ކަމާބެހޭ ސަރުކާރުގެ މުއައްސަސާތަކާއި ވެމްކޯއާ ގުޅިގެން މި ނުރައްކާތެރި މައްސަލައަށް އަވަސް އަދި ދެމެހެއްޓެނިވި ހައްލެއް ހޯދުމަށް ރަށުގެ ރައްޔިތުންނާއި ކައުންސިލުން ދަނީ ހަރުއަޑުން ގޮވާލަމުންނެވެ. ކައުންސިލުން  ހާމަކުރި ގޮތުގައި، ރަށުގެ ބަނދަރު ސަރަޚައްދުގެ އިތުރުން އިރުމަތީ ފަރާތަށްވެސް މެހީގެ އުނދަގޫ އިންތިހާއަށް ބޮޑުވެ، އެ ސަރަޚައްދުތަކަކީ އާންމުންނަށް ގޮސްއުޅެން ނުކުޅެދޭ ވަރަށް މެހި ފެތުރިފައިވާ ދެ ސަރަހައްދަކަށް ވަނީ ވެފައެވެ. މި ނާޒުކު ޙާލަތުން އަރައިގަތުމަށްޓަކައި، ކައުންސިލްގެ ފަރާތުން މިހާރު ވަނީ ދައުލަތުގެ ކަމާބެހޭ އެންމެހައި ރަސްމީ އިދާރާތަކަށް ސިޓީ ފޮނުވައި، މައްސަލައިގެ ސީރިއަސްކަން ހިއްސާކޮށްފައެވެ.

އިޝްތިހާރު