ފ. މަގޫދޫ އައު ހޯލުގެ މަސައްކަތް ބާރުދުވެލީގައި ކުރިއަށް!
ފާޠިމަތު ޢަރޫޝާ
ފ. މަގޫދޫ ސްކޫލުގައި އަލަށް ބިނާކުރަމުންދާ މަލްޓި-ޕާޕަސް ހޯލުގެ މަސައްކަތްތައް ނުހަނު ހަލުވިކަމާއެކު ކުރިއަށްދާކަން އެ ސްކޫލުން ހާމަކޮށްފިއެވެ.
އެ ސްކޫލުން މަޢުލޫމާތު ދިންގޮތުގައި، މިއަހަރުގެ ޖުލައި މަހުން ފެށިގެން ސެޕްޓެމްބަރު މަހުގެ ނިޔަލަށް މި މަޝްރޫޢުގެ ދަށުން ވަނީ ފާހަގަކޮށްލެވޭ ފަދަ ބޮޑެތި ކުރިއެރުންތަކެއް ހޯދާފައެވެ.
މި މަޝްރޫޢަކީ މިނިސްޓްރީ އޮފް އެޑިޔުކޭޝަން، ހަޔަރ އެޑިޔުކޭޝަން އެންޑް ސްކިލްސް ޑިވެލޮޕްމަންޓްގެ ފަރާތުން ނޫފަރު އެންޓަޕްރައިޒަސް ޕްރައިވެޓް ލިމިޓެޑާ ޙަވާލުކޮށްގެން ކުރިއަށްގެންދާ މުހިންމު މަޝްރޫޢެކެވެ. ސްކޫލުގެ ދަރިވަރުންނަށާއި ރަށުގެ މުޖުތަމަޢަށް ބޭނުންވާ ތަފާތު ޙަރަކާތްތަކާއި ޖަލްސާތައް ބޭއްވުމަށް ބޭނުންވާ މި ޒަމާނީ ހޯލުގެ މަސައްކަތްތައް ކަނޑައެޅިފައިވާ ތާވަލާ އެއްގޮތަށް ނިންމުމަށްޓަކައި ގިނަ މަސައްކަތްތަކެއް ކުރެވެމުންދާކަން އެ ސްކޫލުން ފާހަގަކުރެއެވެ.
މި މަޝްރޫޢު ކާމިޔާބުކަމާއެކު ކުރިއަށްދާތީ، މިނިސްޓްރީ އޮފް އެޑިޔުކޭޝަން، ހަޔަރ އެޑިޔުކޭޝަން އެންޑް ސްކިލްސް ޑިވެލޮޕްމަންޓްގެ އިސްވެރިންނާއި މުވައްޒަފުންގެ އިތުރުން، ކޮންޓްރެކްޓަރު ނޫފަރު އެންޓަޕްރައިޒަސްގެ ޓީމުން ކުރައްވަމުންދާ ބުރަ މަސައްކަތްތަކަށް މަގޫދޫ ސްކޫލުގެ ފަރާތުން ވަނީ ޚާއްޞަ ޝުކުރެއް އަދާކޮށްފައެވެ.
މަގޫދޫ ސްކޫލުން މަޢުލޫމާތު ދިންގޮތުގައި، މި މަޝްރޫޢު ފުރިހަމަވެގެން ދިއުމަކީ ސްކޫލުގެ ތަޢުލީމީ މާޙައުލު އިތުރަށް ހަރުދަނާވެ، ރަށުގެ އިޖުތިމާޢީ އަދި ކުޅިވަރުގެ ޙަރަކާތްތަކަށް ބޮޑު ލުޔެއް ލިބިގެންދާނެ ކަމެކެވެ. މި މަޝްރޫޢު ކުރިއަށްދަނީ މިނިސްޓްރީ އާއި ނިލަންދެއަތޮޅު އުތުރުބުރީ މަގޫދޫ ކައުންސިލްގެ އިދާރާ އަދި ކޮންޓްރެކްޓަރު ގުޅިގެންނެވެ.
ގުޅުންހުރި
ޚިޔާލުތައް (0)