ފަލަސްޠީންގެ ބިންތައް ގަދަކަމުން ފޭރިގެން ޔަހޫދީން އާބާދުކޮށްގެން އުފައްދާފައިވާ، އިސްރާޢީލްއޭ ކިޔުނު ޓެރަރިސްޓް ޖަމާއަތުން މިހާރު ފަލަސްޠީނުގެ ޣައްޒާގައި ކުރިއަށްގެންދާ އަނިޔާވެރި ލޭއޮހޮރުވުގައި ހާލުގައި ޖެހިފައިވާ ފަލަސްތީނުގެ ލޮބުވެތި ޢާއިލާތަކަށް އެހީފޯރުކޮށްދިނުމާއި، އިސްރާއީލްއާއި އެޖަމާޢަތައް ވާގިވެރިވާ ފަރާތްތަކާއި ދެކޮޅަށް އަޑުއުފުލައި ފަލަސްޠީނުގެ ލޮބުވެރި މުސްލިމް އަޚުންނާއި އުޚްތުނާއެކު ތިބިކަން ހާމަކޮށް ޝުއޫރު ފާޅުކުރުމުގެ ހަރަކާތްތައް ފ އަތޮޅުގެ ރަށްތަކުގައިވެސް ކުރިއަށް އެބަދެއެވެ. ރަށު ކައުންސިލްތަކާއި ކުލަބް ޖަމްޢިއްޔާތަކާއި މުއައްސަސާތަކުން ގުޅިގެން ރާވަމުންދާ ހަރަކާތްތަކުގައި ރަށްރަށުގެ ރައްޔިތުން އަންނަނީ ފޯރިއާއެކު ބައިވެރިވަމުންނެވެ.
ފ.އަތޮޅު ސްކޫލްތަ ދަރިވަރުން ފަލަސްޠީނާއިއެކު:
މިއަތޮޅުގައި ފުރަތަމަ މިހަރަކާތްތައް ފެށިގެންދިއައީ އޮގަސްޓްމަހުގެ 13 ވަނަދުވަހު ނިމިގެންދިޔަ އަތޮޅު އިންޓަރސްކޫލް ކުޅިވަރު މުބާރާތްތަކުގެ ތެރެއިންނެވެ. އަތޮޅުގެ ސްކޫލްތަކުގެ ދަރިވަރުން ފަލަސްޠީނުގެ ރައްޔިތުންނާއިއެކު ތިބިކަން ހާމަކޮށް ޝުޢޫރުފާޅުކުރުމާއި، ޓީމްތައް ފަލަސްޠީނުގެ ދިދައާއިއެކު ފޮޓޯނަގައި އެއްބައިވަންތަކަން ދައްކައި ދިނުމުގެ ހަރަކާތެއް ކުދިންނާއިއެކު ހިންގީ މުބާރާތް ބޭއްވި އަތޮޅުކައުންސިލުން އިސްނަގައިގެންނެވެ. މިއާއިއެކު މި އިވެންޓްގައި ފުޓްސަލް ޗެމްޕިއަންކަން ހޯދި ދަރަނބޫދޫ ސްކޫލް ޓީމުންވަނީ އެޓީމުގެ އިނާމް ފައިސާގެ ތެރެއިން 3000 ރުފިޔާ ފަލަސްޠީނަށް ހަދިޔާކޮށްފައެވެ.

ބިލެއްދޫ:
18 އޮކްޓޫބަރުގައި ބިލެއްދޫ ކައުންސިލުން ނެރެފައިވާ ދެންނެވުމެއްގައި ރަށުގެ އޮޑިވެރިންނާއި، މުއައްސަސާތަކާއި އާންމު ރައްޔިތުން ގުޅިގެން ފަލަސްޠީނުގެ ރައްޔިތުންނަށް މާލީ އެހީތެރިކަމެއް ދިނުމަށް، ފަންޑް ހޯދުމުގެ ޚާއްސަ ހަރާކާތްތަކެއް ހިންގުމަށް ހަމަޖެހިފައި ވާކަމަށް ދަންނަވާފައިވެއެވެ. ރައްޔަތުންނާއި މުއައްސަސާތަކާއި ވިޔަފާރިވެރިންގެ އެއްބާރުލެއްވުމަށް ކައުންސިލުން ކުރި އިލްތިމާސް އާއިއެކު، ފޯރިއާއި ލޯތްބާއިއެކު ފަންޑްކުރުމުގެ ޙަރަކާތްތައް ފެށިގެން ދިއައެވެ. އެއާއެކު ފެނިގެންދިޔައީ ފަންޑު ފޮއްޓާއިއެކު އެރަށުގެ މަގުތަކުގައި ބޭއްވުނު ހަރަކާތެއްގައި ކުދިބޮޑު އެންމެހައި ރައްޔިތުން ބައިވެރިވެ ފަންޑަށް އެހީތެރިވަމުން ދިޔަތަނެވެ. ހަވީރާއި ރޭގަނޑުވެސް ގިނަބަޔަކު ނިކުމެ ފަންޑް ފޮއްޓަށް ފައިސާ އަޅަމުންދިޔައިރު އޮންލައިން ޓްރާންސްފަރގެ ޒަރީއާއިންވެސް ފައިސާ ޖަމާކުރެވޭނެ އިންތިޒާމް ހަމަޖައްސާފައިވެއެވެ. އެއާއެކު ބިލެއްދޫ ކައުންސިލުންވަނީ ސޯސަލްމީޑިއާގެ ވަސީލަތްތައް ބޭނުންކޮށްގެން، ފަލަސްޠީންގެ ރައްޔަތުންގެ ހާލު ބަޔާންކޮށްދީ، އެހީތެރިވެދިނުމުގެ މުހިންމުކަން ފާހަގަކޮށް ޕޯސްޓްތައް އާންމު ކުރަމުންގޮސްފައެވެ.

ބުރާސްފަތި ދުވަހުގެރޭ ބިލެއްދޫ ކައުންސިލުން ވަނީ ފަންޑުގެ އަދާހަމަ އާންމުކޮށްފައެވެ. އެގޮތުން އެހާތަނަށް 200،657.75 (ދެލައްކަ ހަސަތޭކަ ފަންސާސް ހަތްރުފިޔާ ހަތްދިހަ ފަސް ލާރި) ލިބިފައިވެއެވެ. މިއާއިއެކު ބިލެއްދޫ ކައުންސިލުން ބުނެފައިވަނީ މިހަރަކާތް އިތުރު 2 ދުވަހަށް ކުރިއަށްދާނެކަމަށެވެ.
ފީއަލީ:
ފީއަލީގައި ހަރަކާތްތައް ފެށިގެންދިޔައީ 13 އޮކްޓޫބަރުގައި ކުރިއަށްގެންދެވުނު “ދިވެހިން ފަލަސްޠީނާއެކު” ތިބިކަން ހާމަކޮށް ޝުޢޫރުފާޅުކުރުމުގެ ހިންގާލުމުންނެވެ. މި ހިންގާލުމުގައި ރަށުގެ ވަރަށްގިނަބަޔަކު ބައިވެރިވެފައިވެއެވެ. ފަންޑް ހޯދުމުގެ ހަރަކާތައް ބަލާލާއިރު ފީއަލީގެ ޒުވާނުން ހިންގި ހަރަކާތެއްގައި އެފަރާތްތަކުންވަނީ 3 ގަޑިއެއްހާއިރުގެ މަސައްކަތުން 45،000 (ސާޅީސް ފަސް ހާސް ރުފިޔާ) ހޯދައި އެހީދޭ ފަރާތްތަކާއި ހަވާލުކޮށްފައެވެ. އަދި ފަންޑްހޯދުމުގެ އިތުރު ހަރަކާތްތައް ފީއަލީގައިވެސް ކުރިއަށްދާކަމަށް މަޢުލޫމާތުލިބިފައިވެއެވެ.
ފީއަލީ ކައުންސިލްގެ ދެންނެވުން
ދަރަނބޫދޫ:
“ފަލަސްތީނާއިއެކު” ހަރަކާތުގައި ދަރަނބޫދޫގައި އެންމެއިސްކޮށް ހަރަކާތްތެރި ވަމުން އަންނަނީ އެޖަމްއިއްޔާގެ އާންމު، ކުޅިވަރު ހަރާކާތްތަކުގައިވެސް ފަލަސްތީނުގެ ހައްޤުތަކަށް އަޑުއުފުލައި ފަލަސްޠީނުގެ މިނިވަންކަމަށް ގޮވާލާ ޝުޢޫރުފާޅުކުރަމުން އަންނަ ކުޅިވަރު ޖަމްއިއްޔާއެއްކަމަށްވާ ފުއްޓަރު ސްޕޯޓްސް ކުލަބުންނެވެ. މި ޖަމްޢިއްޔާގެ އިސްނެގުމާއެކު މުއައްސަސާތަކާއި، ކުލަބު ޖަމްއިއްޔާ ތަކާއި އާންމު ރައްޔިތުން ގުޅިގެން ދަރަނބޫދޫގައިވަނީ ޝުޢޫރު ފާޅުކުރުމާއި ފަންޑް ހޯދުމުގެ ހަރަކާތްތަކެއް ކުރިއަށް ގެންގޮސްފައެވެ. މިގޮތުން ބޭއްވުނު ހިންގާލުމާއި ބޮޑުއެއްވުމުގައި ރަށުގެ ގިނަބަޔަކު ބައިވެރިވެ ޝުޢޫރު ފާޅުކޮށްފައިވާއިރު ފަންޑް ފޮއްޓަކާއި އޮންލައިން ޓްރާންސްފަރ ގެ ޒަރީއާއިން ފަންޑް އެއްކޮށް އެހީދޭ ފަރާތްތަކާއި ހަމައަށް ފޯރުކޮށްދިނުމުގެ މަސައްކަތް ފުއްޓަރު ސްޕޯޓްސް އާއި ރަށުކައުންސިލް ގުޅިގެން އަންނަނީ ކުރަމުންނެވެ. ފަންޑް ފޮށި ބޮޑުމިސްކިތުގައި ބެހެއްޓިފައިވާއިރު މިފޮއްޓަށް ފައިސާ ލުމުގެ ފުރުސަރު ހުކުރު ދުވަހުގެރޭ 20:30 އާއި ހަމައަށް އޮންނާނެއެވެ.
ދަރަނބޫ ގެ މުއައްސަސާތަކާއި އާންމުން ފަންޑަށް ފައިސާ ޖަމާކުރަމުންދާއިރު އެރަށުގައި ދާދިފަހުން ހުޅުވި ކެފޭއެއް ކަމަށްވާ “އުސްފަސްގަނޑު” އިންވަނީ އެއްދުވަހުގެ ސޭލްސް އެއްކޮށް ފަންޑަށް ޖަމާކޮށްފައެވެ. އަދި މިދިޔަ ހަފްތާގައި ނިމުނު ފާފު އިންޓަރސްކޫލް ފުޓްސަލް މުބާރާތުގެ ޗެމްޕިއަންކަން ހޯދި ދަރަނބޫދޫ ސްކޫލްގެ ފުޓްސަލްޓީމުން ވަނީ އެޓީމްއަށްލިބުނު އިނާމް ފައިސާގެ ތެރެއިން 3.000 ރުފިޔާ ފަލަސްޠީންގެ ލޮބުވެތި ރައްޔަތުންނަށް ހަދިޔާކޮށްފައެވެ.

މަގޫދޫ:
13 އޮކްޓޫބަރުން ފެށިގެން މަގޫދޫގައިވެސް “ފަލަސްތީނާއެކު” ހަރަކާތްތައް ފެށިފައިވާއިރު ފަލަސްޠީނުގެ ރައްޔިތުންނަށް މަގޫދޫ ރައްޔިތުންގެ ފަރާތުން މާލީއެހީތެރިކަން ދިނުމަށް ކުރިއަށްގެންދާ ފަންޑް ހޯދުމުގެ ހަރަކާތް ރަސްމީކޮށް ފެށުމަށް ހަމަޖެހިފައިވަނީ 20 އޮކްޓޫބަރު ވާ ހުކުރުދުވަހުގައެވެ. މިޙަރަކާތް ހިންގުމަށް ހަމަޖެހިފައިވަނީ މަގޫދޫގެ މުއައްސަސާތަކާއި ކުލަބު ޖަމްއިއްޔާތައް ގުޅިގެންނެވެ. މާދަމާ ހަރަކާތްތައް ފެށުން އޮންނާނީ 16:00 ގައި މަގޫދޫ ދޮންފަސްގަނޑުގައެވެ. މިކަމުގައި އެންމެ އިސްކޮށް މަސައްކަތްކުރަމުން އަންނަނީ މަގޫދޫ ކައުންސިލާއި މަގޫދޫ ޒުވާނުންގެ ކުލަބެވެ.
މަގޫދޫ ޒުވާނުން ކުލަބުގެ ޕޯސްޓް
ނިލަންދޫ:
13 އޮކްޓޫބަރުގައި ނިލަންދޫ ރައްޔިތުންވަނީ “ފަލަސްޠީނާއިއެކު ފ.ނިލަންދޫ ރައްޔަތުން” ތިބިކަން ހާމަކޮށް ޝުޢޫރު ފާޅުކުރުމާއި، ފަންޑް ހޯދުމުގެ ހަރަކާތަކާއެކު ބޮޑު އެއްވުމެއް ބާއްވައިފައެވެ. ނިލަންދޫގައިވެސް ކުދިބޮޑު އެންމެން ކަހަލަގޮތަކަށް މިއެއްވުމަށް ނިކުމެ ބައިވެރިވެފައިވެއެވެ. އެއަށްފަހު މިހަފްތާގައި ކައުންސިލުން މުއައްސަސާތަކާއި ކުލަބު ޖަމްއިއްޔާތަކާއި އެކު ބޭއްވި ބައްދަލުވުމަކަށްފަހު ނިލަންދޫގައިވެސް ފަންޑް ހޯދުމުގެ ޚާއްސަ ހަރަކާތްތަކެއް ހުކުރުދުވަހު ފެށުމަށް އަންނަނީ ތައްޔާރުވަމުންނެވެ. ފަންޑް ހޯދުމަށްޓަކައި ނިލަންދޫ މިސްކިތްތަކުގައި ފަންޑް ފޮށި ބެހެއްޓުމަށް ހަމަޖެހިފައިވާއިރު، ތަފާތު ހަރަކާތްތަކާއެކު ކެންޓީންހިންގުމަށްވެސް ވަނީ ހަމަޖައްސާފައެވެ. މީގެ އިތުރުން ނިލަންދޫ ގަހާގެހި ގާޑިއާގެ ފަރާތުންވަނީ މިއަދު ފުޓްސަލް ދަނޑު ސަރަޙައްދުގައި ފަންޑް ހޯދުމުގެ ހަރަކާތެއް ހިންގާފައެވެ. އެގޮތުން މިއަދު 16:00 އިން 18:00 އަށް ގާޑިއަލުގެ ވިޔަފާރިން ލިބުނު ހުރިހާ ފައިސާއެއް ފަލަސްޠީނުގެ ރައްޔިތުންނަށް ހަދިޔާ ކުރުމަށް ވަނީހަމަޖެހިފައެވެ.
ދަނިއުސް ފަލަސްޠީނާއެކު:
މިކަމުގައި މިހާރު ކުރިއަށް ރޭވިފައިހުރި ހަރަކާތްތަކާއި ކުރިއަށް އޮތްތާގައި ރާވާހިންގާ ހަރަކާތްތަކުގެ އަދާހަމަ ކިޔުންތެރިންނާއި ހަމައަށް ގެނެސްދިނުމަށް ދަނިއުސް އިން މަސައްކަތްކުރާނެ ވާހަކަ ދަންނަވަމެވެ.